內地貨幣政策收放自如保持金融市場穩定
1月29日，天晴乾燥，早上相當清涼，間中仲有兩陣風。隔晚美股反彈，華爾街對近日市況波動各有意見，高盛跟細摩均對後市表示樂觀，高盛指調整係為咗另一個新周期開始，強勁嘅經濟及盈利復甦將帶動股市向上；細摩則致函客戶，建議唔應該理會有關股市泡沫警告，並趁拋售增持，皆因專業投資者遠未及亢奮狀態。對於美股係咪已見頂，古天后無水晶球唔會亂咁估，皆因摸底估頂無意思，古天后只係抱住一個信念，只要全球央行維持貨幣寛鬆政策，市場流動性充裕，實在諗唔到因乜理由要講到股災隨時殺到。
雖然唔少『專家』異口同聲指，過去一年美股以及一眾新經濟股喺疫情下依然屢創新高，估值已極為離地，只要明白到新經濟股嘅年複合增長速度，以及資金泛濫下，銀紙貶值速度有幾快，從而逼使資金流入各類資產，而股票市場正係吸引資金嘅主要資產。加上港股近日嘅北水流入數量跟速度，並非一般散戶盲炒所致，而古天后之前亦已解釋過，北水大手掃入港股嘅背後原因，並非純炒作咁簡單，係背負住國家任務，保持港股維定繁榮，營造好市場氣氛，幫助中資企業喺港股呢個國際資金池集資，以確保喺疫情過後，有足夠資金發展，令內地經濟可以持續復甦。
至於過去幾年喺侵侵政府下，美國對中資企業窮追猛打，唔少投資者憧憬拜登上場後，美國將對中國示好，但事實係拜登政府已表明將延續美中嘅博弈之路，美國對華政策，並未有白宮易主而有所改變。其實中美問題並非一朝一夕，而美國亦意識到近十年中國掘起，為免其長久以嚟嘅領導地位被中國取以代之，美國向中國出招遏止其強大亦無可厚非。
不過美國自2008年次按爆煲引發金融海嘯後，經濟表現一落千仗，本身只係靠無限量寛維持，股市跟實體經濟一直背道而馳，貧富懸殊距離愈拉愈遠。相反中國近年經濟表現愈嚟愈好，GDP與日俱增，早已爬過歐盟成為全球第二經濟體。而喺去年爆發疫情後，中國一直被千夫所指，但中國卻默默做好防疫及抗疫，即使中國所發布嘅染疫數字一直被外界質疑，但事實上，中國面對疫情確切地做到可防可控，社會民生亦係最快回復正常，歐美國家喺抗疫方面確係被比下去。
人民幣匯價表現，正好跟內地經濟復甦情況成正比，成功吸引全球游資流入。金融科技仍然係今年焦點投資主題，內地積極推動金融改革，保持股市暢旺嘅同時，亦要防股市過熱，所以中央近日先放風，防止股市進入失控狀態。市場近日憂慮阿爺收水，事實上內地貨幣政策並未改變，過熱時收緊，適當時候放鬆，以確保金融市場穩定。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。