8月28日，短暫時間有陽光，有幾陣驟雨，局部地區有雷暴。雖然鮑爺喺Jackson Hole嘅發言偏鷹，但美股上周反彈向好，標指回試4300見支持反彈，周五晚升0.67%，目前於4400附近徘徊；納指更升近1%。目前VIX升至17危險警界線就回，暫時美股唔似有大跌風險，
雖然美股喺8月初被評級機構下調評級，美債及美股均見有沽壓，10年期債息一度高見4.36%，不過今次債息上升跟通脹預期無乜關係，反而係短線資金炒作，喺Jackson Hole會議前炒高，開會前偷步食糊。預期息口走勢喺10年跟2年息差倒掛85點子情況下，反映明年減息1厘，跟預期吻合。鮑爺講話偏鷹，表示美國GDP較預期強勁，令年經濟及通脹降溫不似預期，並強暗示「有需要」時會再度加息，其實講嚟講去佢口風都無乜點變，6月時已暗示過下半年或會加息兩次，7月加咗一次後，即係今年底前仲有機會加多次。債息上升另一個原因係美國赤字並唔樂觀，由6月至今財政部已增發約9600億美元債券，巨大財赤令債券量供應增加，債價自然下跌拉動債息向上。
至於港股喺周五表現麻麻，反彈幾日後周五又再回落至18000水平，成交更跌至813億元，估計喺周三計結算，港股都唔彈得去邊。雖然阿爺周日公布減免一半印花稅，今日起實施，預計今日中港股市裂口高開，但唔好又畀古天后睇死，能夠高開但難以高走，高開完升幅縮水係意料中事。不過市場或憧憬港股呢邊會跟阿爺走，睇下波叔幾時肯跟內地減印花稅。
即使阿爺減半股市印花稅，但外資早已一去無回頭，單係今個月已再拋售超過480億元A股，民間缺水情況未有改善，減低印花稅唔等於會有更多資金入場。另一方面，債可敵國嘅恒大(03333)復牌，但同時阿爺救股市嘅組合拳，就包括限制A股股東減持，講緊都係限A股，港股尚未有呢啲限制，恒大復牌難免又被拋售。
其實阿爺要救嘅並非股市，而係內地樓市，樓市繼續爆雷，最終只會影響內銀，不過畀恒大復牌，令到恒大仍有機會喺資本市場搵水魚，若能成功集資抽水，有足夠現金還息畀銀行，咁內銀就能避免出現大量呆壞幅，呢個係阿爺一直唔畀恒大倒下嘅用意，實在係保內銀，因為恒大負債中有超過6000億屬於銀行負債，恒大只要還到息畀銀行，銀行無事重要過恒大生死。
其實中港兩地減低印花稅能否救活股市，都係要睇外資會否重臨，不過減咗印花稅對成交始終會有幫助，至少短炒客同高頻交易可以生存，搞返活個成交都好重要，交易成本太高，就算股份質素再好，都係拍烏蠅無生意，但交易成本下降嘅話，垃圾都有人短炒，至少營造到交投暢旺呢個景象，升升跌跌有得炒，總好過水清無魚無人問。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。