8月15日，部份時間有陽光，有幾陣驟雨，天氣炎熱。隔晚美股反彈，雖然美國10年債息升至今年內高位，但大型科企股價做好帶動下，三大指數收升。道指升26點，標指跟納指分別升25點及143點，目前標指仍守住4400-4450重要支持，而納指則守位13700水平。但人民幣持續走弱下，隔晚夜期跟ADR偏軟，跌至18600水平。預期今日港股再低開，18500水平料有一定支持，即使反彈阻力為18800-18850左右，而已回補裂口18965阻力更大，港股要扭轉跌勢，至少要回補噚日下跌裂口，重返19050先至無咁愁。
內地上月新增貸款明顯減少，拖累人民幣急跌，兌港股當然不利，噚日港股插水，除咗人仔走弱不利內房，本身內房板塊一直受債務問題困擾，拖累大市整體氣氛。恒指全日跌301點，收報18773點，失守18800支持，跌市成交增至過千億元，近期反彈成交縮，跌市成交增，都唔係好嘅現象。雖然上月底阿爺曾揚言出招救經濟，一度帶動大市回升至二萬水平之上，可惜至8月初阿爺遲遲未推出具體措施，乜嘢組合拳都係打嘴炮，鼓勵全民皆股得啖笑，加上經濟下行壓力增加，內房爆雷愈演愈烈，資金何止唔肯入市，直情係走得快，好世界。
內房股接連爆雷，遲早會波及內銀，呢個係阿爺最唔想見到嘅事，睇返目前內地銀行業金融機構不良貸款4萬億，其中商業銀行不良貸款2.7萬億，至於商業銀行撥備覆蓋率205%，假設整個銀行業同商業銀行嘅撥備覆蓋率相若，內銀行早已預咗內房爆鑊做得防洪措施，撥備做大咗大約3萬億至4萬億。至大鑊係阿爺一直想保交樓，唔想民間出亂子，但與此同時，恒大(03333)、融創(01918)、碧桂園(02007)、富力(02777)、佳兆業(01638)及世茂(00813)等等嘅債務問題已爆雷，相繼出現違約，甚至係流動性已出現問題，輕側需要進行債務重組，重側全部破產，咁即係內銀所持嘅內銀債務，大部分都會變為爛賬。呢6間民企，表內計息負債萬幾億，資產負債表總共超過6萬億，表外債就計唔掂，而呢6間民企資金鏈斷裂之際，將會牽連一眾周邊企業情況，尤其供應商被拖死，火燒連環船嘅情況將會出現。
雖然內銀早已為內房債務作出巨額撥備，但咁搞法內銀儲落嘅撥備覆蓋率消耗大部份，可能會跌至低於100%。純計賬面，內銀就算未死得，但防守力已大減。若然上面提到嘅6民企內房齊齊反艇，保交樓任務可以點完成，莫非又要由國企接手?? 國企又係咪搞得掂，阿爺要點補貼?? 呢個係內房債務以外，再衍生嘅問題。
內地樓市爆破，無論係政府、個人、抑或企業都陷入債務危機，已經無可避免，阿爺一再放水，但民間已無力再借。內地M2過去十幾年以10%以上增速發展，印錢量早已超越美國兩倍。大陸之前係水浸，但多咗嘅錢就投入啲燒錢嘅科網產業；內地政府大高好睇而無得食嘅基建工程；內房瘋狂發展三、四線城市，呢啲行為早已種下今日禍根。內地今次要如何面對同解決，古天后亦只有放長雙眼睇阿爺有乜本事，可以收拾呢個爛攤子。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。