內房債務問題成港股死穴
11月9日，大致天晴，早晚天氣清涼，日夜溫差頗大，非常乾燥，早晚出門記得添衣。美國喺上個周末期間，通過基建法案，令大市維持樂觀氣氛，美股隔晚三大指數又創收市新高。今個月係感恩節，跟住又到聖誕節消費旺季，美股有長期大好友表示，今年將會是其中一個表現最好嘅聖誕季度，預料年底標指或有望升至4800點，明年底前則升至5200點。
美股就日日新高，愈玩愈起勁，港股呢就愈玩愈縮，主要係港股近日被內房債務問題持續困擾，自恒大(03333)持續出現到期債券未能支付利息，需要跟債權人講數，要求提供寛限期之後，陸續再有其他內房出現同樣情況。恒大問題一日未解決，港股都好難有好日子過。
而恒大嘅違約問題，已蔓延至其他同業，恒大之後，佳兆業(01638)亦出現違約事件，而內地上市嘅內房陽光城集團已在香港交易所發布公告稱，將美元債要約交換嘅截止期限延長兩天至11月12日，給投資者更多時間來支持該交易。呢啲情況隨時引發交叉違約。
事實上，內房股嘅債務問題，已蔓延至投資級別嘅內房債券，今次事件主角係世茂集團(00813)。上周有報道指集團旗下一間附屬公司現正與陸家嘴國際信託就延長借款嘅還款期進行商討，集團股價上周曾單日大跌超過一成。其後，集團召開投資者會議，並表示該傳聞並不屬實，集團與陸家嘴信託嘅合作正常及穩定，過去亦未發生過逾期或延遲付款情況。雖然集團已出嚟澄清，但股價未見反彈，加上有消息指集團主席抵押旗下物業套現應急，好明顯投資者對內房股嘅債務問題仍然擔心。
古天后擔心嘅係一旦短期具投資級別的內房企業債價急瀉，經紀行會追孖展及收緊信貸，隨時出現火燒連環船，內房債市將面臨更嚴峻情況，到時真係無眼睇。不過有實力嘅內房股，已開始進行回購，低價回購當然係好事，只係有實力回購嘅內房股又有幾多間? 最擔心係內房債務高峰期喺明年第一季，而阿爺講明唔准新債冚舊債，即係內房還債要靠自己，喺過去幾個月銷售強差人意，再無金九銀十下，資金回籠唔切，內房資金將更緊絀，屆時可能更影響港股整體表現。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。