內房調控難終止 相關股份勿急於配置
11月12日，天晴及非常乾燥，日夜溫差較大。雖然通脹數據顯示通脹可能維持一段較預期長嘅時間，但市場逐漸消化遠高預期嘅強勁通脹收據，美股個別發展。道指跌158點，不過標指跟納指反彈，分別升2點及81點。有分析指強勁嘅經濟數據或令聯儲局加息步伐加快，最快可能喺明年7月開始加息，較預期早兩個月，而喺明年12月再加息一次，而2023年最少加息3次。明年加息已成定局，暫時美國債息未有再見太大變動，市場已欣然接受，嚟緊美股點發展，好大程度要睇經濟情況及企業盈利表現。
至於港股隔晚喺夜期跟ADR都有唔錯表現，多得騰訊(00700)業績後靠穩，即使季度業績表現一般，但集團將焦點放去元宇宙，市場似乎都受落。留意騰訊喺450元水平有不俗支持，但股價反彈至100日線494元至500元阻力頗大，業績前撈咗貨博反彈，短炒要睇位食糊。
目前港股最大絆腳石仍然係內房債務問題，而年結將至，傳統上資金將轉趨緊絀，而喺金融機構「落雨收遮」收緊貸款，樓市銷售驟冷打斷資金回籠下，內房股雪上加霜。而內房嘅財務問題對社會融資、消費和固定投資等各環節影響亦逐步浮現，故要求當局放鬆調控的聲音亦日大，連內房央企都要求阿爺放鬆三條紅線，畀大家一條生路。
只係內房佔經濟重大比重，過去無序發展令阿爺不得不出招撥亂反正，睇怕阿爺無咁容易心軟，內房調控難已結束，頂多係喺調節一下鬆緊度，政策目標係要避免行業硬着陸拖垮整體經濟，並非保住個別房企。中國對於調控房地產市場採取企硬態度，主要係從日本泡沫經濟爆破，進入迷失30年嘅教訓中得到啟示，再加埋2008年美國嘅金融海嘯，亦係因為次按危機而引發，可見房地產整治相當重要，否則將危及金融體系，甚至翻身無期。換句話講，內房股有一段時間仍要咬緊牙根捱落去，經過行業整合，捱得過呢關，就會成為生還者。但喺呢一段時間，內房股偶爾反彈，只係由挾淡倉推動，內房市場仍然弱勢，都係等待消息更明朗時再採取進一步行動，暫時唔急於喺投資組合內配置內房及物管股。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。