內房貸款雖鬆綁 內房股暫難言翻身
11月2日，多雲，日間部份時間有陽光，無咗太陽，感覺又涼咗啲。美股喺11月首個交易日做好，三大指數齊創收市新高，道指升94點；標指跟納指升97點。相反噚日港股喺11月首個交易日下跌，今日若然跟得到美股向上，都要留意25600至25800有阻力，唔係話過就過。不過收復到20日(25311)及50日(25297)平均線匯聚區都好過無，跟住就係要睇10日線(25777)能否收復，或成為短期阻力。
截至上周五，標指已有過半數成份股公布咗第三季業績，當中超過八成盈利超過預期，如果可以保持落去，市場預期標指公司的盈利增長率超過36%，將是自2010年以來第三高的盈利增長率。雖然美股屢創新高，當大家都以為美國經濟已走出疫情危機，但好多美國人就唔認同，當地最新一項民意調查顯示，超過一半美國人認為當地經濟狀況並不理想。呢項調查嘅被訪者中，65%受訪者為目前美國經濟狀況唔理想，只有35%受訪者認為目前經濟表現良好。而呢班受訪者47%認為明年經濟會更差，只有30%受訪者覺得明年會更好景。受訪者感覺唔到經濟環景好，可能係通脹導致百物騰貴，銀紙無咁好使，自然唔覺經濟好轉。
雖然美股一片歌舞昇平，但就連華爾街大好友，都擔心至今年底，美股或出現「融漲」(melt-up)現象，即係投資者蜂擁入市係因非理性樂觀情緒，而唔係企業基本因素，呢一段升浪被視為股市最後升浪，升幅可以相當驚人，一旦melt-up去到頂點，當然就係一個大幅度嘅調整。不過又唔好畀好友呢番言論而嚇親，因為佢講緊之後嘅大調整，都只不過係一成左右。而美國強勁嘅經濟基本面、優於預期嘅業績、低廉嘅資金成本跟場邊等待嘅大量現金，係推動美股持續走高嘅動力。反而去到明年，國會舉行中期選舉，將會為美股增添不確定性，亦成為美股調整嘅藉口。不過大好友所指嘅調整，可能係三至六個月後發生嘅事，有智慧不如趁勢，暫時都睇唔到有乜嘢因素令到美股出現大調整，倒不如今朝有酒今朝醉，有得炒咪繼續炒住先。
至於港股仍然維持上落市格局，資金仍然喺不同板塊之間輪動，指數則處於區間上落，目前上落區間大約係24800至25800左右，近日都喺一千點內上落，下面支持24500至24800守得下，但25800-26000漸形成一道阻力，都莫過話再向上挑戰100日線(26390)，甚至250日線(27435)。
雖然阿爺放風為內房融資鬆綁，內地陸續有不同城市放寬房策，但市場似乎唔多受落，內房股走勢維持疲弱。其實目前嘅所謂鬆，只係之前對銀行過度限制房地產貸款行為糾正，屬政策微調，而非徹底放鬆。而開發貸款只係佔房企融資的14%，影響有限。內地將維持對房地產嘅絕大部分調控，直至情況變得太困難為止，但目前仍言之尚早。只可以話房地產調控或已見頂，但房地產稅改革等措施可能打擊新樓銷售，房地產行業環境及整體經濟或繼續惡化。換句話講，內房股就算跌到死死下，估值已跌至䉀渣價錢都好，暫時都係難樂觀，要記住從跌得多都唔係一個買貨理由，內房股要捱過寒冬再見春天，似乎尚要經過一段時間。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。