全球經濟復甦不均 發達國家前景較為明朗
7月23日，大致天晴，日間天氣酷熱及有煙霞。美國上周新申領失業救濟人數意外增加，但投資者對經濟前景仍感樂觀，美股隔晚美低後高。道指升25點，標指跟納指分別升8點及52點。雖然美股表現甚為硬朗，但仍有分析指美股喺今年稍後時間將出現大幅度調整，於10月底前或跌15%或更多，主要係聯儲局縮減買債嘅速度快過預期，以及Delta變種病毒加速傳播，都係股市面臨嘅主要風險。而近日虛擬貨幣急挫，表現疲弱正正係警號，反映高風險資產面臨更大麻煩，市場避險情緒持續升溫。
上半年股市主題當然係經濟復甦，嚟到下半年投資者應該關注嘅係經濟復甦反覆唔穩定，流動性正面臨邊際收縮。喺全球疫苗接種進展不均衡嘅情况下，各地經濟復甦亦會出現唔均衡格局。雖然喺發達國家經濟復甦即使見波折，但前景愈趨明朗化，反而新興市場國家嘅疫苗接種相對滯後，喺變種病毒威脅下，經濟復甦亦變得滯後。不過美股估值實在唔平，某程度上已充分反映對經濟嘅樂觀預期，而美國聯儲局取態亦已由鴿轉鷹，並可能喺2023年底前加息兩次，對於資金投放美股較為審慎。
至於內地股市，下半年增長股板塊業績表現可能更佳，喺政策風險及監管風暴下，相關增長股已消化估值重評壓力，「數碼經濟」仍然係新經濟投資關鍵主題。個別板塊方面，增長股焦點仍然係關注新能源汽車、新能源、醫藥生物、半導體等板塊；「數碼經濟」主題則關注為物聯網、智能汽車、雲計算及AI等數據產業鏈。
河南省暴雨成災，鄭州市出現百年一遇超級暴雨，構成巨大經濟損失，甚至為中國整體經濟帶嚟嚴峻考驗。不過有券商指災情對中國土GDP影響有限，尤其河南喺內地經濟發展相對滯後，估計水災短期內或有機會波及黃河下遊地區其他省份，將構成更大經濟損失，但對整體影響唔大，主要係去年鄭州市GDP僅佔全國的1.2%，故是次災情對中國經濟表現影響較輕。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。