利淡因素夾擊 港股持續疲弱
9月16日，大致多雲，日間部份時間有陽光及炎熱。隔晚美股先跌後回升，三大指數反彈，道指升236點；標指跟納指分別升37點及123點。雖然部份經濟數據反映通脹增長放緩，加上美國非農業就業數據表現疲弱，但聯儲局仍有可能在今年之內開始縮減買債規模。而歷史數據顯示，9月美股表現通常麻麻，自1945年以來，美股喺9月份平均下跌0.56%，唔少分析師認為今年9月或10美股可能即將出現重大回調，回調幅度可能達5至15%。
美股累計升幅唔嘢少，即使回調最多一成半，美股玩家今年仍有斬獲，但港股相對弱過藥煲，踏入9月以嚟，港股反覆向下，噚日恒指一度失守25000大關，再一次逼近前低位24500水平。港股表現疲弱除咗係內地監管風暴沒完沒了之外，恒大(03333)債務危機或引發整個內房產業嘅流動性，甚至影響到內銀嘅資產質素，利淡消息頻傳。而噚日就輪到濠賭股暴跌，主要係澳門或收緊對博彩業監管，並展開諮詢，濠賭股續牌平添不明朗因素。幾個板塊齊齊走弱，拖低指數，港股呢鋪真係屋漏兼逢連夜雨。
古天后早喺兩個幾月前，科網股監管風暴愈演愈烈之際，已多次提醒科網股將會有一段時間無運行，期間只會有波幅，冇升幅，最近阿里(09988)旗下嘅螞蟻集團傳出或將網貸業務與支付寶剥離，面臨拆骨嘅同時，意味住螞蟻集團整改或已接近尾勢。而騰訊(00700)嘅網遊業務整改深化，美團(03690)亦被巨額罰款；科網整改有機會接近尾聲，只係呢個板塊幾時翻身，古天后無水晶球，當然估唔到。
新意網樂意與股東分享成果
不過總有科技股差不多係時候可以收集，好似月初公布咗業績嘅新意網集團(01686)，剛剛被大摩調升目標價並給予增持評級，主要係睇好集團喺香港嘅數據中心業務表現。由於香港土地資源珍貴、建築成本高及興建周期長，令本地數據中心服務市場領先供應商免受劇烈競爭，而新意網嘅龍頭地位，可以受惠行業市場增長。
睇返新意網嘅股價表現，今年以嚟仍錄得逾一成升幅，較內地數據中心服務同業累跌逾兩成表現優勝，公司喺本港高質素數據中心產能中佔27%，預期未來五年供應中佔34%。事實上，新意網亦樂意跟股東分享業績成果，由2004年開始派發末期股息，股息金額亦每年遞增，對小股東愛護有加。喺過去三年期間，集團位於將軍澳數據中心開展、落成、出租及錄得收入，喺盈利持續攀升及估值上升嘅利好因素下，股價一直穩步上揚，三年股價累升五成，一直係大漲小回格局，其抗跌能力較國內同業股及大市更見卓越。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。