利率升而經濟唔升 銀行股難有作為
5月16日，大致多雲，初時有幾陣驟雨，氣溫有所下降。上周五美股回升，三大指數高收，道指升466點；標指跟納指則分別升93點及434點，反彈力度唔錯。美股反彈嘅原因主要係債息有所回落，10年期債息回落至3%以下。雖然美股反彈，但自3月開始，入場資金仍然以散戶為主，相反機構投資者喺同一時期卻繼續減持美股。換句話講，呢一輪美股反彈，只係超賣後嘅技術反彈，暫時好難講得上係轉勢，低位有撈貨，或者仲有蟹貨喺手，只有繼續觀察，再趁反彈去整理手上持股，目前都未係可以太過進取，大手進場嘅時候。
至於港股亦隨外圍反彈，不過喺港元跟人民幣仍然疲弱下，入場資金唔算多，跟3月中從18200水平反彈至22400嘅時候，成交激增至3000億元不可同日而語，估計呢一輪反彈，能夠重上10日線(20287)及20日線(20506)已經算唔錯。要反彈至50日線(21102)暫時睇怕唔夠資金配合，要重上22000水平，更加係遙不可及。呢一個月港股都係繼續上落市格局，暫時嘅移動區間大約係19000至21000水平呢2000點之間上落，大家手上有貨，都要趁反彈減持。
中美歐三大經濟區現不確定性
環球步入加息周期，唔少人都以為銀行股可以隨住息率上升而升風破浪，結果出嚟當然未如人意，講到底都係銀行息差喺過去十幾年嘅減息周期之中一直收窄，即使目前息率回升，銀行資產回報率亦見唔得有幾吸引。雖然利率上升確會令息差增加而提升資產回報率，但可惜經濟未能向上，甚至有陷入衰退風險之際，不僅貸款需求未見增加，壞帳風險上升，對銀行盈利反而會有負面影響。
喺過去幾個月，雖然歐美利率趨升，但因為中美歐三大經濟區出現不確定性，美國早前公布的首季國內生產總值(GDP)收縮1.4%，歐洲因受俄烏衝突所造成的高天然氣價格影響，經濟衰退壓力增加，中國則因抗疫有機會導致消費及出口減慢，而影響經濟增長。即係要支持銀行股盈利回報上升嘅兩個條件，目前只係合符咗一個，另一半經濟增長目前仍落空。呢個就係點解銀行股喺本輪加息潮之中，表現強差人意嘅原因。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。