北水一日唔離場 何懼短線波動
1月28日，天晴及乾燥，日間溫暖，晚上風勢強勁，氣溫急降，要返工晚歸嘅朋友，記得著多件衫喇。美股出現網民惡鬥沽空機構，令視像遊戲零售商GameStop近日股價如過山車，網民更成功挾爆沽空大戶之後，再有另一股份AMC被網民吹捧後，股價急升三倍，反映市場投機氣氛濃厚，引起有關當局關注。美國納斯達克交易所行政總裁Adena Friedman表示，正關注社交平台嘅內容，如果發現任何個股出現異常活動，將會勒令股份停牌。而納指交易所亦與美國金融業監管局(FINRA)及SEC正調查近日爆升股份，有否涉及非法市場操縱行為。美股此等股份嘅異動，甚至引起白宮關注，白宮發言人普薩基表示，美國財長耶倫跟拜登嘅經濟團隊正在密切關注GameStop及其他股票遭大量做淡嘅股票交易活動。
美股炒爆引起有關當局關注係好事，過度投機對市場健康發展係一大障礙，美股正好趁呢個機會冷卻一下。除咗有關投機事件惹嚟當局關注外，企業盈利表現參差，美股隔晚三大指收顯著回落，創近三個月以嚟最大單日跌幅，三大指數跌超過2%，標指已蒸發今年以嚟升幅。聯儲局議息結果一預市場預期，但鮑爺指資產價格上升，係來自市場對疫苗支持經增復甦嘅憧憬，但實體經濟及近日嘅經濟數據仍然不濟，所以聯儲局仍有一段時間維持寛鬆貨幣政策。
除咗美股大幅回調，定必影響市場投資情緒之外，阿爺亦放風警告市場已有泡沫，中國人民銀行官員開腔示警，暗示貨幣政策可能針對「某些領域的泡沫」進行適度轉向，以免加劇風險！阿爺金口一開，貨幣政策收緊之聲四起，港股噚日已插水七百幾點，今日難免再捱沽，即管睇睇29000大關能否失而復得。
諷刺嘅係北水並未有停止流入港股，噚日喺大市跌到一仆一碌之際，北水仍錄得230.18億港元淨流入金額。而係1月接近尾聲之際，屈指一算，北水流入港股累積已達2700億港元。而高盛預測今年北水南來嘅規模，將高達950億美元，折合超過7400億港元。其實古天后之前都講咗，北水肩負起維持港股穩定繁榮嘅重任，至於背後原因之前已作詳細分析，今日唔再長氣講多次。古天后對後市仍有信心，只係港股喺不足一個月之內急升3000點，升至30000點水平，回調係必須亦係意料之內。估計恒指有機會回落至28000水平，但只要28000能守穩，港股後市仍會以一浪高於一浪姿態向上推進。
不過今年港股波幅將擴大，個股波幅閒閒地5至15%，入得場玩要有心理準備，見到大市調整亦不必大驚小怪。古天后早於月初大市升得興起時已警告，切勿因為2021年開局理想而過度亢奮，控制注碼及風險，對大市升跌抱平常心，反正炒股唔炒市嘅仍為今年主調，對於指數上落又何必太過介懷，只要北水繼續流入，每次大市回調，正好係吸納優質股份嘅大好機會。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。