北水主導市場 放心跟住北水走
1月12日，天晴及非常乾燥，日間有太陽時氣溫回升至雙位數，但一早一晚天氣寒冷，繼續注意保溫。美股周一三大指數齊創新高後，隔晚出現回吐，當中以納指跌勢較為顯著，全日跌165點，跌幅超過1%。美國債息近日回升，觸發市場加息預期，美國貨幣市場嘅期貨合約交易顯示，投資者預期聯儲局2023年9月前加息一次以上。不過講緊最快加息都係2023年，家陣就擔心加息似乎有啲杞人憂天。只係近日美股升勢又確係急咗啲，連美股大好友都轉咗口風，警告美股升勢過急，隨時出現暴跌。其實資本市場瞬息萬變，保持警覺性係喺市場生存之道，加上近日升勢似乎由非理性樂觀情緒所帶動，一旦市場亢奮情緒冷卻，美股出現較大幅度調整亦在所難免。
不過港股相當美股落後幾條街，而港股自啟動互聯互通機制後，早已由內地資金主導市場，單係今年首6個交易日，已有超過850億港元北水透過港股通掃貨，淨流入額度已超越2018年全年。港股少咗外資參與，由過往外資，尤其美資主導變成由北水主導。過往缸邊友都睇住外資大行做人，外資大行嘅報告，係市場嘅重要指標。不過今時今日已再無呢枝歌仔唱，中資大行報告愈來愈受市場重視，尤其係對於中概股嘅詮釋，中資行更為了解國情國策，預測中概股嘅盈利及目標往往較外資更為準確。
睇返過往一年，中資新經濟股升到飄皮，外資大行嘅目標價一直落後，唔少外資大行報告目標價，甚至係掉轉頭畀股價帶住走，外資大行經常出現預測偏差，人家股價升咗一倍，所謂大行報告先後知後覺因應其升勢而調高目標，畀人一種落後於人嘅感覺，可見外資早已喺港股失去話語權。
由北水主導港股有辣有唔辣，皆因北水嚟得快亦可以走得急，加上A股過往咁多年嘅表現，亦令投資者擔心當港股貨源盡入中資手，外資絕跡，港股A股化後，會否步A股後塵，變成一潭死水呢?? 呢一點古天后又唔係太擔心，今時今日嘅北水已經係醒目資金，而北水亦擔當維穩重任，斷唔會搞死港股自掘墳墓。而內地愈見富裕，對理財需求大增，唔少內地私募基金投資港股，外資參與度雖然減少，但亦唔會捨得港股呢個暫時仍出入自如嘅大賭場，只不過莊閒位置有所改變。預期喺中美金融博弈下，港股仍要擔當中企籌集海外資金平台呢個重要角色，今年大量中概股keep住嚟港股上市，加埋喺美股上市嘅中概股回流，港股今年應維持好景，港交所(00388) 股價及相關新聞 做得到獨市生意，自然水漲船高，難怪大行將其目標價再三調高，今年要變身大牛股應無懸念。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。