北水唔再任性 只採高沽低買策略
8月3日，大致多雲，間中有驟雨及雷暴，有時雨勢頗大。美股隔晚回落，主要係美國眾議院議長佩洛西到訪台灣，令中美關係變得緊張，加上有聯儲局委員指加息將一直維持至明年第二季，投資者入市轉趨審慎。三大指數均見下跌，道指跌402點；標指跟納指分別跌27點及20點，暫時納指仍然跑贏大市，主要係債息回落令科技股反彈力度較大，已升穿6月高位12320點，不過仍受制下降軌頂部12850。
雖然美債息較早前有所回落，不過當有聯儲局委員開腔，指加息將持續至明年第二季，債息又抽升至2.75%。美國土GDP連續兩季負增長，技術上已步入衰退，市場憧憬聯儲局將停止加息，甚至減返轉頭，只係今次喺通脹高企情況下，聯儲局難如往常輕鬆地以減息救經濟，因為一旦將息率下調，通脹壓力將大增，低增長夾住高通脹，亦即係滯漲已發生，市場憧憬明年減息似乎係過度樂觀，一廂情願嘅諗法。
噚日港股喺台海局勢緊張下，跟住內地股市插水，失守20000大關後跌勢加劇，並向下至19500水平喘穩，呢兩日跌市成交有所回升，當然有人認為係沽壓大咗，但同時亦20000水平樓下，開始有資金流入撈貨嘅現象，只係流入資金唔算多，加度當然有限。
呢個現象可以從北水動作反映，雖然騰訊(00700)一直受到大股東南非基金減持嘅陰霾所困擾，但呢兩日北水積極接貨，而過去兩日北水都見淨買入，說明港股喺20000水平樓下，已重見吸引力。不過北水已唔再如過往般一味高追，今年以嚟都係採取高沽低買策略。北水唔再任性，我哋一般股民更加要小心行事，不過現水平吼返個股跟進，仍然可行。至於古天后都係吼位美團(03690)同京東(09618)一對孖寶，而友邦(01299)嚟到75水平，似乎亦開始有值博率。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。