6月27日，天氣炎熱，部份時間有陽光，間中有幾陣驟雨。美股隔晚回調，之前美股嘅上升，主要靠幾隻重磅科網股挾淡倉帶動升勢。不過當四巫結算後，挾淡倉動力消失，美股開始失去向上動力。隔晚美股高低走，道指跌12點；標指跌19點，開始逼近4300支持，小心一旦失守4300支持，下個位要睇4200。至於納指則受Tesla大跌6%影響，納指跌156點。標指回試4200尋找支持，大家都要提高警覺，主要係估值上現價唔算便宜，尤其息口未見回落，現水平先追入美股，回報率仲要輸畀定存利息，加上6月初國會就提高美國債務上限開綠燈，財政部已開始增量發債，8月開始便會進入高峰期。估計在未來幾個月新發行債券吸金量便高達3700億美元，有機會抽走市場部份資金，美股或有機會出現較大幅度調整。
雖然發債會抽走市場資金，但講到尾，政府拎到筆錢之後，都係要花費，最終呢筆錢又係去返經濟體上，只不過提高債務上限之後，明年估計債市或吸金約1.7萬億美元，係今年吸金量兩倍，一旦債市吸走太多資金，仍然會影響美股流動性壓力，基金大戶唔會再好似過往有咁多閒錢，好難支持基金再喺高位追入美股。
美股隔晚回吐，但中概股相對硬淨，主要係阿里(09988)宣布分析盒馬鮮生上市，只係阿里股價高開2%後，最終升幅收窄至0.65%，未有高位收市。而電動車股則保持升勢，但升幅已較早兩日縮咗水。
中港股市一直最缺係資金，外資一直減持港股，再加上人民幣走弱，對中港股市本已係利淡，外資一去不回頭，北水又愈炒愈短，已再無昔日只買不沽嘅豪氣，應該係傻勁至真，北水都發覺到港股可以短炒，但難長坐，彈出彈入。當一直未有長線基金入場，北水彈出彈入，港股維持有波幅，無升幅，一日唔見港股定落嚟，進行橫行收集，間中就挾淡倉升返三四星期，但跌就唔使一星期搞掂，咁嘅狀況，真係難以跟牛市沾上邊。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。