北水暫仍無緣參與第二上市股份
5月18日，部份時間有陽光，天氣炎熱，間中有幾陣驟雨，更有局部地區有雷暴，天氣酷熱。倫敦逐步放寬社交距離措施，但亞洲呢邊疫情嚴峻，被視為抗疫典範嘅台灣近日亦告失守，連日確診個案破頂，陷入封城狀態邊沿。美股隔晚回軟，反映投資者取向再傾保守。不過科技股喺加息預期降溫下，沽壓漸漸退減。
而亞太區股市噚日表現疲弱，相反A股發力，資金回流內地股市，上證噚日重上3500點，創業板亦回升至2月底水平，係深成指數差少先見突破，不過升勢有成交配合，相信要進一步向上突破無難度。噚日內地公布嘅經濟數據表現強差人意，偏偏股市上升，主要係市場預期阿爺眼見咁嘅情況，可能會推出更多政策刺激經濟，尤其係內需方面。阿爺喺舊年疫情逐步穩定後，大力推動內偱環，但今次表現差勁嘅零售數據，有機會觸動阿爺神經，內循環根基未，唔排除中央再加大力度推動消費。
至於另一個講法係內地經濟數據差勁，阿爺可能再放水，不過人行已多次強調唔會再搞大水漫灌，呢個係市場共識。雖然阿爺唔會隨便放水，但只要流動性充足，整體借貸利率穩定，亦唔存在放水需要。尤其當亞太區咁多地疫情爆到七彩，相反中港兩地抗疫表現理想，自然吸引資金流入。
恒指服務公司將於周五收市後公布季檢結果，由於完成諮詢下已落實恒指成份股數目將增加，預期今次將會逐步增加成份股數目，未來消費、醫藥跟科技行業嘅覆蓋範圍將明顯擴大，成為呢次染藍大熱門。而被納入港股通範圍嘅大熱門則包括醫渡科技(02158)、心通醫療(02160)、諾輝健康(02158)、朝雲集團(06601)及賽生藥業(06600)等等。
至於市場一直期待第二上市股份阿里巴巴(09988)、京東(09618)等可被納入港股通，但之前古天后講過第二上市中概股，一旦被納入港股通，北水經港股買入相關股份後，可換成第一上市股份，令資金間接流走，呢個係阿爺唔想見到嘅情況，而港股通會否納入第二上市股份嘅決定權，並唔係香港呢邊說了算，估計係潛在資金流出中港兩地嘅可能性存在下，暫時第二上市股份北水仍無緣參與。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。