北水炒消息快嚟快去要跟貼
6月10日，大致多雲，短暫時間有陽光，間中有幾陣驟雨。美股隔晚反覆偏軟，道指跌152點；標指及納指則分別跌7點及13點。市場屏息以待，等緊今晚公布嘅CPI，呢個數字應可以打破悶局。上個月公布的4月CPI指數按年增長4.2%，遠高於市場預期，若然5月份數字仍然高企，或者真係令到聯儲局需要調整貨幣政策，縮減買債甚至為未來加息而鋪路。雖然美股幾個主要指數偏軟，但散戶跟網民抱團股仍然熱炒，表現波動。講真，呢類網紅股純粹由散戶資金動力，受股民情緒影響炒作，走勢波動難免，炒呢類股真係要眼明手快，仲要心臟強大，否則都係眼看手勿動。
而相關炒作早已引起監管當局注意，美國證交會(SEC)主席表示，正考慮改革美國市場，包括評估股票定價及買賣情況的潛在改變。主席喺Piper Sandler全球交流金融科技會議上表示，已要求美國證交會官員就唔同方面提出新建議，包括更好地執行、監管全國市場系統(NMS)、股票落盤流程、最低定價增量、全國最佳買賣盤等各方面，其目的係繼續令美股市場保持高效。之前，SEC已表示對於近日散戶熱炒股異常波動感到關注，可能因此對Robinhood等美股交易平台實施新規則。
至於港股呢邊唔上唔落，港股面對嘅係缺水問題，北水近日流入顯著減少，資金繼續喺唔同板塊之間流動，但炒作停留嘅時間則愈來愈短。好似上星期內地公布三孩政策消息一出，相關概念股炒起急升，但翌日相關股份已見回吐，過多兩日更打回原形，重返三孩政策消息公布前水平。噚日更有內地媒體消息，引述從事乳品業嘅中國飛鶴(06186)，其高層在出席一內地論壇時表示，因為注射液苗影響，好多本來計劃生育嘅人6個月內唔可以懷孕，預計奶粉銷量將會受到打擊，甚或喺未來一兩年或出現斷崖式下跌。
呢個消息一出，飛鶴股價急跌至最低18.84元，其後內地媒體撤回相關報道，又話引述其高層指，公司逐漸挽回中國消費者對國產嬰兒奶粉嘅信心乜乜物物咁。而公司更加喺午後急急發通告，指指計劃動用不超過兩億美元資金，即日起在公開市場購回公司股份，回購股份總收不會超過已發行股份總數的10%。雖然如此，該股股價周三仍要跌6%，收報19.24元。
雖然公司出動到回購呢一招，而內地媒體亦撤回先高層嘅言論，不過說話講咗出嚟，就提醒咗市場，疫苗接種對於未來一至兩年生育率嘅潛在負面影響，三孩政策亦可能未得到本來預期效果。值得留意係噚日當乳品股被呢個消息嚇到腳震之際，龍頭蒙牛(02319)股價不跌反升，令人猜測蒙牛托住個價，唔通又係為咗批股抽水而鋪路???
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。