升彈過後最怕進入長期橫行階段
3月22日，多雲有霧，有幾陣雨，稍後局部地區有雷暴，雨勢漸轉頻密。隔晚美股回頭，道指結束五日升勢，跌201點；標指跟納指則分別跌1點及55點。上周聯儲局一如預期將利率調高0.25厘後，主席鮑爺警告通脹太高，將會加大加息力度，已準備好加息半厘，以抑制經濟增長過熱，並決心緩解高企的通脹水平。呢個加息力度，跟之前市場預期今年每次加息0.25厘有出入，市場自燃有所避忌，美股急彈後回調亦屬正常。
大摩則表示，上一次美國經濟衰退完結至今僅過去約22個月，惟該行嘅經濟周期模型顯示，目前周期已升至接近上一次高位，反映近期嘅反彈速度快到唔多尋常，現時美國經濟正處於「擴張」階段尾聲，按住呢個步伐將於2至4個月內達頂，其後5至10個月便邁進「下降」期。大摩指美國經濟衰未必不會立即出現，但盈利減少或比早前預期更差，建議投資防守性高、營運效率較高及能產生高現金流嘅股票。換句話講，美股仍處於極度唔穩定嘅情況，加上美股唔少股份並未有喺今次反彈浪受惠，實際上仍有唔少股份處於年內低位，歸根究底都係估值問題。
至於港股呢邊，恒指喺上周見咗近10年以嚟低位，估值則處於低過3年平均標準差，市盈率平過新興市場，終令阿爺忍唔住出手，加上中美元首對話前引起無限憧憬，鐘擺效應下令股市急彈，資金亦開始由之前極高避險情緒下釋放，再度提高風險胃納。
而港股呢輪反彈嘅最大動力，當然係中國國務院因應市場情況嘅聲明，最新互惠基金的資金流數字，截至上周三，有逾200億美元資金流入股市，債市卻連續10星期走資。只係港股呢輪反彈，18200水平所謂政策底部，能否確定為今年底部，古天后雖有保留，但仍傾向相信呢個政策底，應該有強大支持。值得留意係。債息曲線「倒掛」正處於開啟初期，從領先經濟指標與通脹數字嚟睇，滯脹機會愈嚟愈大，尤其係年內債市資金外流一直未停。
喺暫時唔見有更壞嘅消息下，而市場又開始習慣跟不確定局勢共存，股市短線反彈料可持續，但通常一個跌浪反彈至20日線，目前處於21450水平，就會遇上阻力力，要進一步挑戰50日線23171難度則更大，若然未見有更利好消息釋出，港股可能反彈至此即行人止步，而接住嘅就係放煙花過後，回歸淡靜嘅日子，對於缸邊友嚟講，唔怕你無升幅，最怕你無波幅，進入一個橫行平台窄幅上落，慢長等待嘅日子，將會更加難捱。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。