反彈浪接近尾聲 減磅套現靜待下次入市機會
6月8日，多雲，有狂風雷暴及驟雨，有時雨勢頗大，未來幾日不穩定天氣持續。美股隔晚反覆做好，仍然離唔開日升日跌格局，喺現水平上落，三大指數已逼近阻力位。美國聯儲局已開始縮表，只係喺目前市場資金仍充裕嘅情況下，流動性並未受影響，上市企業目前仍有資金進行回購，只係繼續收水嘅話，流動性或遲啲會受影響，咁現水平再入市追貨值博率已唔大，美股去到呢啲位都係食花生等機會。
嚟緊美國將會公布CPI，預咗通脹數字仍高企，但市場有樂觀派表示，通脹有機會見頂，美聯儲局未必再進取地加息。不過從零售業嘅狀況睇，高通脹已實實在在地影響咗零售市道，消費者因為物價高企而減少消費，而購買力亦大大減弱。
為咗去庫存，零售商不得不減價，美國第2大百貨零售商Target開始要降價去庫存，持續落去就係毛利受損，唔排除零售企業嚟緊會被削盈利預測，企業本身對前照睇法亦會轉趨保守。一旦下一季企業盈利繼續走樣，相信美股點都再有一輪調整。美股話已經走出熊市，暫時毫無說服力，只係熊市反彈以相當凶狠，咁就不如耐心等待下次入市好機會。
至於港股繼續喺成交薄弱下反彈，雖然由20000邊反彈至現水平，升幅已超過1500點，技術指標亦開始反映港股已進入超買水平，只不過喺衍生工具影響下，大量熊證喺22000水平結集，大戶要再挾升指數去殺熊，似乎不費吹灰之力。
值得留意沽空力量已開始減退，大市向上就少咗沽空冚倉嘅力量，呢一輪反彈逼近22000-22500水平，應進入尾聲，現水平雖然未可以貿易加入淡軍行列，但再追貨值博率大減，倒不如檢示手上組合，有需要減磅調整，增持現金再等下一次調整入場。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。