9月5日，短暫時間有陽光，有幾陣驟雨，稍後局部地區有雷暴。美股隔晚假期休市，歐洲股市高開低走，略為倒跌收市，原因係歐債息回升。美元保持強勢，美匯指數回升至104.1，美元強勁新興市場理應走弱，不過阿爺周末期間使出組合拳，令人民幣一度回升至7.255水平，不過喺美元強勢下，無奈再落至7.27-7.28水平左右，暫時人民幣仍然喺7.25至7.3水平游走，暫難擺脫弱勢上落。
阿爺出招使出組合拳，周末內地各大城市睇樓量及成交量有所回升，經紀更表示為應付客戶工作至凌零深夜，北水噚日借勢炒高內房股，整個板塊內股份閒閒地升一成以上。恒大(03333)成功復牌，已反映阿爺唔希望恒大倒下，主要係擔心其骨牌效應或拖累銀行。阿爺一方面出招救樓市，托樓價，另一方面指導內房賣樓套現自救，恒大系復牌自然係畀機會恒大利用股市進行集資，搵白武士營救。
不過以家下嘅環境，內房要喺市場配股集資唔容易，碧桂園(02007)則透過發行新股方式償還部份到期債務，以股代債，債主拎到股票後，自行喺市場沽貨套現，一來碧桂園可以減債，另一方面又冇需要自掏腰包，喺公司拎現金出嚟還債，唔怕再影響到流動性。據悉，公司計劃對7隻達103億元嘅境內債進行3年展期，拖得就拖，總知就係長命債長命還。只係內房本身資產負債表都相當難睇，能否避過破產一劫言之尚早，仍有待時間去觀察。
以估值而論，中港股市估值確係吸引，可惜外資撤走後，暫仍無意回歸，以A股為例，噚日兩市成交只有8848億元，成交未能配合升勢，反映資金仍唔多願意入場。至於港股呢邊，恒指升462點或2.51%，升至18844點，成交1526億元，其中部份係上週五打風，未完成上板嘅MSCI rebalancing調倉，但整體都算有成交配合大陽燭上升，理論上短期表現可以好返啲，再向上挑戰其他移動平均線。只係持續唔見新資金入場嘅話，噚日嘅成交有大部份可能係回補空倉，一旦空倉回補完成，再無新資金入場，噚日暫時退避嘅淡友，隨時又會再出擊。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。