台海局勢變化難測 地緣政治風險升溫
6月8日部份時間有陽光，有一兩陣驟雨，天氣持續炎熱。雖然美國官員一再強調通脹即使出現都係短暫現象，但耶媽就話加息對聯儲局都係好事，惹嚟收水疑雲，港股噚日高開低走。除咗有關通脹消失以及加息推斷外，外媒報道美國3名聯邦參議員乘搭美軍運輸機抵達台北松山機場，引嚟全球注視中國嘅回應，兩岸緊張關係升級。港股連跌4日，恒生指數收市報28787點，跌130點，50天線失而復得，暫時又係區間上落。
今年台灣都算頭頭碰著黑，先係遇上旱災缺水，有機會影響到芯片廠嘅正常生產；其後大停電進一部打擊生產信心，再到近月疫情大幅反彈，喺一年確診個案持續清零下再度失守，疫情嚴峻又再令防疫措施再度升級影響經濟活動正常運作。而喺呢個敏感時刻，台海局勢再度緊張，喺中美關係持續惡劣下，未知中國會否趁病攞命，若然兩岸動武而挑起美國把火，故事發展可以相當嚴重，呢一點缸邊友真係咪掉以輕心。
台海局勢變得更為複雜，地綠政治風險升溫，而6月份半年結日子，大戶隨時出現「大撼大」場面。樂觀啲睇基金可能粉飾櫥窗，但有心做淡嘅淡友大戶，又豈會輕易畀基金得手。暫時6月都係無乜方向，缸邊友若然未能睇通透，倒否如先減磅套現再觀察，好好控制注碼跟資金流短炒個別板塊，係呢段時間喺市場自保嘅方法。
而噚日有股份忽然高台跳水，股價急挫八成，原因係公司出售資產後，被交易所評為不再適合上市，市值單日蒸發65億元。見到呢啲情況，一般都係食下花生隔岸觀火，奇怪竟然有缸邊友見股價急跌想博反彈，對於呢啲情況，古天后奉勸一句，避則之吉，勿接飛刀，皆因呢啲情況一旦公司拉閘停牌，投放落去嘅資金可以連渣都無得剩。不過今之交易所嘅行動，好耐未見過咁嚴厲，呢間公司能否成功上訴推翻有關除牌決定仍屬未知數。不過呢件事反映咗企業融資嘅零活度或下降，對中企嚟港股上市需求或有負面影響。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。