各大央行年內難見縮表機會
6月15日，早上局部地區有幾陣驟雨及雷暴，日間部份時間有陽光及炎熱。隔晚美股個別發展，其中以科技股為主嘅納指再創收市新高，報升104點，為4月26日以嚟高位。道指早段下跌，尾市收市跌幅收窄，跌85點；標指同樣創收市新高，升7點。美國聯儲局於今明兩日舉行議息會議，市場普遍預期貨幣政策維持不變，只係喺通脹升溫下，聯儲局會否開始放鷹，並提早收緊貨幣政策，市場同時關注目前通脹急升情況若非短暫，貨幣政策會否提早收緊。而聯儲局有關貨幣政策言論，將會令市場波動。
港股噚日為端午節假期，而隔晚ADR則上升，預期今日港股表現唔會太差，只係未有特別利好消息帶動下，港股仍然膠著，靜待聯儲局議息，恒指仍然喺28500至29300點之間上落，暫未見任何突破痕跡。市場目前最擔心係通脹上升一旦並短暫，而係長期現象，將逼使聯儲局提早收水。不過聯儲局早前報告指，美國家庭財富升至約137萬億美元，創紀錄新高。受惠股市跟房產價上升推動，加上美國政府紓困措施及刺激經濟方案， 反映美國每一次出現危險經濟，均以寬鬆貨幣政策，無限期地將問題往後拖延。美國財赤已達於2萬億美元創新紀錄。歐洲央行維持利率不變，為市場預期 。歐美兩大經濟體系，年內難見縮表機會。
即係只要各大央行喺年內唔閂水喉，股市今年下半年表現唔會太差，加上唔少高增長，經過一輪殺估值後，估值已重返較為合理水平，雖然相關股份已難復去年勇勢，但至少個別股份已成功搵到支持，股價表現好壞，取決於業績能否交足功課，支撐一個較傳統股更為進取嘅估值。
個股方面，瑞聲(02018) 股價及相關新聞 過去兩周股價顯著做好，主要受惠華為發布鴻蒙2.0系統，消息利好5G以至整個手機產業鏈股份表現，不過公司首季業績遠勝市場預期，令市場重新關注瑞聲嘅毛利率喺經歷過去三年跌勢後，今年開始復甦並開始顥著反彈，值得留意。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。