吉利內需新能源雙概念中線之選
1月6日，早上清涼，日間部份時間有陽光，天氣相當乾燥，明日顯著轉冷，可能今晚夜啲都會涼啲。隔晚美股止跌回升，三大指數回升，納指升幅更接近1%，大型科技股普遍做好。不過市場開始擔心一旦民主黨全取參眾兩院控制權，可能導致加稅及採取該黨進步派主張嘅政策，令股市受壓。有分析指，如果民主黨大獲全勝，將掀起市場大規模輪動，投資者對財政、稅務、環保及監管等政策重新量度，對市場係一個負面影響。
過多兩日有關美國國會選舉就塵埃落定，不過侵侵喺任期內餘下十幾日整色整水，周二禁止美國企業與阿里巴巴(09988) 旗下嘅支付寶、騰訊(00700) 旗下微信支付及QQ錢包等8個中國軟件應用程式進行交易。但係市場都有共識侵侵大勢已去，只要拜登一入主白宮坐正，呢啲行政命令或成為歷史。睇返相關股份隔晚喺ADR嘅表現無乜影響，一來對侵侵呢啲招數已習慣，二來都預咗侵侵難以喺總統選舉中翻盤，家下搞咁多嘢，待拜登上場後，相關行政命令隨時成為廢紙一張。
不過有關紐交所話要將三大中資電訊股除牌一事，話除又唔除，跟刹停螞蟻集團上市一樣咁兒戲，同時反映美國內鬥白熱化，將令到政策變得搖擺不定，投資者更無所適從。但正因為美國內部七國咁亂，反而對中國有利，自美國選舉以嚟，中國股匯齊升，反映資金由美國流出，中國就接收晒由美國流走嘅資金，對港股嚟講亦有利，喺港股上市嘅中資股份，當然亦係資金追捧對象。
除咗舊年一直熱炒嘅中資科網股，去年第四季大量資金流入內需股及新能源股，主要係投資者相信呢啲板塊都係受惠「十四五」所訂下嘅政策，而內地確係全力催谷內部需求，喺科網股面臨內部攻策及美國制裁風險之際，內需股確成為資金避險之選。至於減碳排係大勢所趨，新能源概念股受捧亦合理，對於呢兩個板塊，古天后仍充滿信心，內需股呢期睇住中國飛鶴(06186) ，皆因之前推介過嘅蒙牛(02319) 坐咗火箭，飛鶴估值相對便宜咗一截，大有條件追落後。新能源就睇住一對信義孖寶(00968)及(03868) 。至於古天后中線睇好嘅吉利汽車(00175)，可以話內需及新能源兩個概念兼備，只要吉利股價能夠升穿28元，應該可以一飛沖天，暫時仲要畀啲耐性，吉利喺26元樓上企穩，打好個底先有條件再挑戰高位。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。