唔願承擔長假風險 聖誕假後再作定奪
12月22日，天晴，天氣非常乾燥，早晚相清涼。美股隔晚反彈，多得Nike跟Fedex業績好過預期，道指升526點，標指跟納指分別升56點及162點，標指再度逼近3900，即係之前3900-4100區間整固底部，估計聖誕節假期前，標指會喺3900水平爭持。Nike業績好過預期，反映美國零售市道無之前預期咁差，至於Fedex業績就反映公司已捱過最差嘅時間，只係兩股高開後，未見有資金高位再追貨，暫時美股投資者只願意低位吸納，而高位追貨免問，亦說明標指喺3900水平之上，值博率已大減。
雖然美國於年中開始出現裁員潮，但喺剛公布嘅業績反映，裁員潮並未影響零售市道，美國業務收入增長仍然強勁，即使中國業務增長放緩3%，但整體計算今次收入仍錄得17%增長嘅驕人成績，去庫存未有拖累盈利下跌。Nike嘅業績說明咗，美國就業市場唔係差，大企業裁員嘅同時，仍有逾千萬個就業職位等住用人。而從美國銀行股嘅業績亦反映，裁員潮下，銀行壞帳未見大幅長升，而美國GDP喺今年首兩季出現衰退後，第三季已回復增長，預期第四季可保持增長，只係增長速度有否回升。市場一直擔心美國經濟衰退，其實所謂衰退已喺今年上半年出現，並於下半年漸漸回復，來年只不就業市場保持平穩，通脹受控，美國經濟陷入衰退機會唔大。
港股成交縮到乜嘢咁，預咗聖誕節長假，市況更趨淡靜，呢兩日大市回調至19000附近支持不俗，只係未見再有資金入場，要再大升重上二萬唔係無可能，咪靠每日裂口跳升，但呢啲裂口虛長升勢，見裂口走去追貨，要有心理準備要再坐一會。總之長假期前，買貨要三思，尤其喺19000水平之上買貨，值博率已大減，唔想承擔長假期風險，寧願失走機會，靜待更佳入場位置，寧買貴，莫買錯，呢兩日提早收爐，準備過聖誕節。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。