嚴守止蝕保本要緊 保留實力靜候機會
5月11日，天氣炎熱，部份時間有陽光，局部地區有幾陣驟雨，未來幾日都係咁又熱又侷。放咗兩日假，呢兩日恒指變動唔大，但恒科技走晒樣，失守八千大關，重磅科技股跌到一仆一碌，睇見唔開胃。雖然五一假期完結，北水回歸，但市況仍未見起色，北水唔單止未見積極掃貨，更對個別新經濟股踩多兩腳，噚日就錄得資金淨流出超過30億元。
雖然指數暫時上上落落無乜方向，但傳統股又唔見到特別有活力，只有資源股因為商品價格暴漲仍有運行，其他重點板塊沽壓嚴重，恒指二萬八並非牢不可破，至怕久守必失，一旦二萬八失守，恒指或需下試27000至27500點尋找支持。恒科技表現更不堪入目，穿咗8000點，目前正逼近前低位7642，ATMX稍為踩多腳，呢個前低位隨時失守。暫時ATMX睇住幾個位，騰訊(00700)穿咗600，下個位係250日線，570左右，穿埋再下一個位550；阿里(09988)對上一次低位207，總之200大關不容有失，否則下面無險可守。
美團(03690)更加大大鑊，CEO詩興大發，被市場解讀作借題發揮，向阿爺抗議監管，雖然公司解釋市場解讀錯誤，但被約談已成事實，加上阿里有前科，市場怕美團步其後塵，先沽而後快。穿咗批股價兼失守250日線, 250元係一個關鍵位，今日失守好自為之。小米(01810)雖然喺24-25元之間徘徊，但印度疫情嚴峻對其業務肯定有負面影響，呢啲水平似乎未完全反映呢個負面因素，總之睇住24元，穿咗下一個位22元，暫時短炒都唔使諗住。
傳統股方面，銀行股尚算靠穩，但前景並唔樂觀，地產股更加唔使諗，上升動力嚟到現水平已唔大。雖然大宗商品價格狂升，推動資源股向上，只係相關股份累積一定升幅，現價追入值博率大減。古天后最擔心係美股喺估值高企下，終迎來一次深度調整，屆時港股定必受累，若然缸邊友到呢一刻仍然重倉，只有待反彈再減倉，保本要緊，留得青山在，等市況喘定再重新部署，總好過賴死唔走，望極唔見家鄉。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。