嚴守止蝕大原則 風險管理唔少得
12月29日，大致天晴，部分地區能見度較低，今日氣溫仍然溫暖，但留意明日天氣顯著轉冷，今晚開始北風增強。承接平安夜升勢，美股聖誕節假期後繼續做好，美股三大指數齊創收市新高。美股呢個星期只有四個交易日，預期接近元旦假期，交投將保持淡靜。睇返美股由年初至今全面上升，道指升6%；標指上漲約15%，納指大幅跑贏，今年以嚟爆升43%。
美股今年喺疫情下表現強勁，全靠聯儲局不斷放水，兼且有聯邦政府財政刺激方案，再加埋疫苗趕及喺年底呢段時間推出，均支持美股中期前景維持正面樂觀。不過值得留意係，美國投資者借入孖展額度已打破2018年5月6689億美元紀錄，即使美國民眾未至於全民皆股，但投資者孖展額創新高可能預示市場之後會更為波動。咪見美股近日保持升勢，就將槓桿過高嘅風險拋諸腦後，謹記喺牛市期間，亦有機會出現大幅度調整，今年3月美股幾度熔斷，跌到一仆一碌嘅情景，唔排除再出現。
今年首季美股急挫引發全球股市暴跌，當然係因為世紀大疫症所引起，3月份全球股市暴跌，當然守得住兼且喺4月份肯入場，全程投入新經濟股，至今回報當然豐厚，明年會否再出現類似震盪，古天后無水晶球，無法預知未來，只能高度防備，以應對突如其來嘅黑天鵝事件。
目前美股喺高位徘徊，甚至屢創新高，除有賴於全球央行持續放水之外，疫苗面世亦令市場情緒維持樂觀，深信疫情可以喺疫苗面世後受控。只不過疫苗成效有幾大，暫時仍屢未知數，有否嚴重後遺症，以及接種進度能否如預期，皆存在好大變數。再者英國及南非已出現變種病毒個案，目前疫苗對變種病毒有效與否，變種病毒會否引發新一波疫情，殺傷力會否更強，均令疫情維持不明朗因素。
至於全球貨幣量化寛鬆，確係逼使資金流入股市，令股市跟實體經濟背道而馳，但長期過度資金充裕，將加重未來通脹壓力，尤其喺疫情持續下，影響到種植及開採資源等經濟活動，難免引發環球商品及食品價格上升，一旦通脹來襲，環球央行侷住由放水變收水，對股市帶嚟嘅衝擊，實在唔敢想像。地綠政治風險亦係不能忽視嘅因素，尤其南海局勢緊張，一旦有任何擦槍走火事件喺南海發生，可觸發國與國之間開戰。
觀乎目前嘅情況，投資者均對明年經濟復甦寄予厚望，尤其喺今年疫情下基數甚低，明年經濟反彈可期，只係今年股市未有因疫情暴跌，反而喺首季閃跌後觸底反彈，美股甚至再創新高，疫情受控及預期經濟復甦等因素，或已過度反映。而近日資金從新經濟股大規模流走，重新轉往傳統股如內需、消費及新能源股，某程度上已響起警號。總之喺股海生存之道，就係保本為上，無論參與任何投資工具炒作，謹守止蝕為第一大原則，稍有風吹草動要識跳車逃生，好好管理風險。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。