四大投資主題 新舊經濟要集齊
1月5日，早上多雲，日間部份時間有陽光，天氣乾燥，最高氣溫又係廿度以上，但過兩日氣溫又急降至10度樓下，注意好好保暖。港股2021年首個交易日開局表現唔錯，但美股就無咁好環境，道指開市早段再破頂，但迅間已轉升為跌，更一度急挫724點，跌穿三萬大關，其後跌幅收窄，但三大指數收市仍要跌逾1%。美股今年係自2016年以嚟首次開局錄得跌幅，會否預示今年美股全年要插水，古天后無水晶球懶得去估。
不過美股隔晚收黑盤，又有大淡友衝出嚟高呼美股正呈現巨大泡沫，目前美股被高估咗兩至三成。淡友經過呢三兩年美股大牛市，等股災等到變望夫石仍未見股災出現，今次呢位美股大淡友都戴定頭盔，表現只要利率保持喺低位，以及經濟活動大幅萎縮，未來12個月泡沫都唔會咁快爆破。即係講完等於無講過，古天后一向認為預測市場走勢係一件吃力不討好嘅事，總之每日留意市場走勢，順勢而行，又何必作任何推測，估中又無獎，估錯淪為笑柄，跟住資金走幾時都無錯啦……
隔晚美股插水，主要係市場擔心拜登上場後，其政策或不利股市發展，不過古天后又唔係太擔心，只要回顧一下過往民主黨代表總統政績，除咗行大運嘅克林頓任內美國曾出現財政盈餘，其他民主黨代表總統可以話一事無成，政績乏善可陳。仲要拜登年紀有返咁上下，更加未必喺政策上會有乜嘢搞得出樣，其競選期間所提到嘅加稅等措施，喺肺炎疫情影響下，經濟復甦為大前題，至少今年之內難以加息。加上委任耶媽為財長，鴿派嘅耶媽應為華爾街受落，持續貨幣寬鬆政策再加埋弱美元政策，美股要成災真係極有難度。
細摩喺聖誕節假期前發表有關2021年投資主題報告，推薦四大投資主題包括內需、數碼化、金融開放及碳中和，古天后亦同意呢四大主題係今年投資焦點，不過推薦股份就有啲出入。內需股古天后呢期嘅得意推介當然係海爾智家(06690) 股價及相關新聞 ，同場搭多隻JS環球(01691) 股價及相關新聞 ，值得留意係細摩推介嘅中聯重科(01157) 股價及相關新聞 ，古天后同樣睇好，貪佢估值夠晒抵。數碼化當然要揀龍頭騰訊(00700) 股價及相關新聞 ，而雲計算又點少得明源雲(00909) 股價及相關新聞 同萬國數據(09698) 股價及相關新聞 呢啲行業龍頭。內地已表示要落實金融開放，除咗行業改革，開放市場係另一重點，對於呢個主題，古天后一直睇好嘅港交所(00388) 股價及相關新聞 將會愈戰愈勇，而去到舊年第四季先起動兼創新高嘅友邦(01299) 股價及相關新聞 ，今年要注意逢回吐要吼位掃貨。環保大趨勢下，個個都講碳中和，近日古天后推介嘅信義光能(00968) 股價及相關新聞 同信義能源(03868) 股價及相關新聞 一對孖寶，再加埋具新能源汽車概念嘅吉利(00175) 股價及相關新聞 會係古天后心頭好。至於小米(01810) 股價及相關新聞 可以話係誇概念股份，唔覺唔覺市值已漲至八千億樓上，繼續向住一萬億大關進發，今年完成目標應無懸念。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。