增短線操作密食當三番為目前最佳策略
3月30日，部份時間有陽光，天氣炎熱，最高氣溫去到30度，仲有一段時間先食五月粽，但睇嚟寒衣已可入櫳。隔晚美股個別發展，大型家族投資公司Archegos資本管理爆煲，野村跟瑞信因此錄巨額損失，市場憂慮仍有其他投行瀨嘢，相關股份受壓。不過道指隔晚仍錄得98點升幅，再創收市新高；標指跟納指則分別跌3點及79點。
上周五多隻中概股和美國媒體股遭洗倉，皆因美國家族投資公司Archegos資本管理未能補交孖展而遭斬倉所致。有消息指美國證交會匆忙召集銀行開會，討論與Archegos資本管理有關嘅逾200億美元(1,560億港元)股票被迫出售原因。至於美國金融業監管局官員正在就券商業務受到嘅影響、潛在信貸風險及其他威脅進行詢問。
Archegos出事，有指該基金以五倍槓桿操作，所以當美國再重提未合審計規格嘅中概股將被退市，相關股份受壓嘅情況下，基金未能補足孖展搞到爆煲，更連累投行硬食巨額虧損，事件會否愈演愈烈，更多投行牽涉其中，火燒連環船，缸邊友必要打醒十二分精神。呢次家族投資公司爆煲，搞到連監管機構都高度關注，實在不能掉以輕心，連基金大戶都被斬倉，可見過度槓桿真係死得人。之前科技股炒到興高采烈，唔少缸邊友以衍生工具操作，再配以孖展買正股，至上月美國債息開始急升，削弱高估值股份吸引力，市場爭相拋售相關股份，未有於高位減磅食糊，甚至愈賭愈大嘅缸邊友，喺呢個幾月以嚟，肯定擺低相當甘嘅學費。交咗學費上咗寶貴一課未嘗係好事，至怕係交完學費仍然唔識死，唔肯投降又或者見短線反彈就急於撈底，恐怕損手爛腳，蝕到入肉被逼離場。
古天后經常強調，無論買乜嘢股份，邊個位入場都好，入場前先制訂策略，長線分段吸納又好，短炒投機又好，都需要計好數，預晒可承受風險，計定止蝕位，保本為上最緊要。策略制訂後入場，勿忘初心，切忌短炒變長揸，長線投資又過份怕死，自亂陣腳。唔少缸邊友都有一個通病，遇上買入股份急跌，已跌穿止蝕位，仍猶豫不決唔肯止蝕，自我催眠總有一日重見家鄉，其實好多時坐艇坐得耐，自然變得麻木，就連審視所持股份基本因素有否改變都忘記，以至損失愈嚟愈大，帳面唔見四五六七成，就更加唔願打靶離場，又或者係打得太遲再打亦冇意思，綁死資金更損失機會成本，久而久之經常性成為大戶點心，最終被市場完全淘汰。
立定決心要喺資本市場搵食，緊記守紀律嘅重要性，而執行止蝕就係守好紀律嘅基本，經歷第一季嘅大上大落，展望第二季暫時喺北水未回歸前，港股可能都係上落市居多，呢段時間正好係鍛鍊紀律，豐富經驗嘅好機會，增加短線操作，密食當三番，好可能係安然過渡目前上落市嘅最佳策略。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。