外圍不明朗因素漸增 港股好淡通殺難參與
6月20日，短暫時間有陽光，有一兩陣驟雨，天氣炎熱。上周五美股個別發展，喺四巫日結算下，三大指數表現反覆，納指跌近10500支持位前，反彈力度較大，不過標指跟道指走勢較弱，尤其道指喺石油股亦回軟下，道指反彈更乏力。美國聯儲局繼續放鷹，連一直較為鴿派嘅官員，都開始轉軚，支持喺通帳高企下，7月份加息0.75厘屬恰當，至少都要加息0.5厘。
喺美國加大收水力度下，資金逃離風險資產，避險情緒高漲，股市當然有回調壓力，虛擬貨幣市場更於周末期間又爆洗倉潮。一哥比特幣價格曾大跌14%，低見17593美元低位，雖然其後反彈，幣價重返2萬大關，但過去一周重挫逾三成，重返2020年12月低位。全球虛幣市值已跌破1萬億美元，雖然相對美國高達21萬億美元嘅經濟總產值或價值43萬億美元嘅樓市相比相當微不足道，甚至不及蘋果公司股票市值一半，但根據高盛調查顯示，喺全球加密貨幣市場中，美國人持有1/3；美國民調和智庫公司Pew Research Center所做嘅調查發現，16%美國成年人曾投資、交易或使用過加密貨幣。虛幣市值大縮水，意味會影響消費意欲，而消費則貢獻美國經濟達七成比重。
靜觀其變 待入市機會
美國消費市場受影響係必然嘅事，而內地消費市道本身亦受疫情及封城影響，今年由京東(09618)主導嘅618購物節，銷售只錄得10.3%增長，遠低於去年的27.7%。就算各大平台大打折扣，銷量亦谷唔起，反映內地內需放緩況嚴重。事實上內地經濟喺疫情及其嚴厲嘅防控措施下，出口工廠新訂單呆滯，內房支出大幅縮減，而科技龍頭喺去年監管下，亦見裁員消息流出。
雖然喺近日阿爺推出多項政策穩經濟下，A股大幅反彈，兩市成交近日更重返1萬億元，不過近日私募基金再發行新基金之際，市場反應冷淡，可能係上半年少新基金面臨清盤，面對汰弱留強，市場未明朗嘅情況下，基金銷售低迷可以理解。
至於港股喺過去兩周雖然見有資金流入，但同時見港元再次觸及弱方保證，情況似乎相當矛盾。若然要解釋呢個現象，可以話流入嘅熱錢屢借消息炒作，單係阿里(09988)旗下螞蟻集團重啟IPO嘅消息，過去兩周已兩度誤傳。喺全球收水去槓桿嘅情況下，熱錢只有短炒而未見收集，盲目跟風不慎高追又變韭菜，大戶上下其手好淡通殺，既然如此，又何必參與呢一場泥䊢摔角，倒不如靜觀其變，等待入市機會，一動不如一靜。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。