外圍炒通脹見頂 港股乘機挾淡倉
9月13，天晴，天氣乾燥炎熱，局部地區有煙霞，日間天氣酷熱。美股隔晚繼續反彈，市場揣測通脹已見頂，三大旨數齊升，標指重上4100水平，突破下降軌頂部，納指亦逼近12300水平，同樣係下降軌頂部。留意今晚美國公布CPI數據，市場憧憬見頂回落。實際通脹能否見頂回落係另一回事，美股近日就係炒上落，好淡通殺。不過虛幣市場回升，資金近期確似risk on，同單日波幅擴大，稍一不慎又被殺倉。
歐央行已於上周議息，並一如預期加息0.75%，加息之餘亦暗示10月議息再加0.75%，歐股竟然不跌反升，喺歐元反彈下，歐股隔晚錄得逾2%升幅。歐股能夠反彈，多得美匯指數略為回落至108水平，而10年債息則保持在3.35%水平。
雖然歐美股市形勢大好，但球經濟仍難樂觀，裁員之聲未停過，最新有德國商業銀行考慮關閉10%分行數目，以降低成本，同日高盛宣佈近一輪裁員計劃，但市場反應係壞消息當好消息炒，銀行股升可也。留意係有消息指俄烏戰爭有望透過談判停火，呢個都係挾升股市嘅好消息。
中港股市周一中秋節假期休市，但上周五長周末前，有資金偷步挾上，主要係賭美股反彈持續，恒指挾升507點至19362，只係成交額偏低，只有922億元。港股已進入買賣兩間一段時間，但沽空比例有無減，沽空得厲害，自然誘使大戶挾淡倉，港股升跌又何需理由。
預咗騰訊(00700)大股東將咁大批貨存入CCASS，都係為咗沽貨作準備，週四晚Naspers表示喺市場開始沽貨，最新持股降至27.99%，估計要再減持多1%，持股低於27%時先會再有新公佈。過去兩日從高盛CCASS倉位顯示，喺市場沽售400萬股，相信當中大部份是Naspers沽貨，Naspers志在套現，已唔多理會騰訊股價是否偏低，皆因邊個位沽貨都贏大鑊。其實Naspers已講明會持續減持。騰訊再花3.5億元回購115萬股作回應，年初至今騰訊合共回購了2814萬股，但仍遠低於Naspers要沽貨嘅數目1.9億股。要繼續應付回購，騰訊就只有沽手上其他投資項目，市美團(03690)將會係待價而沽嘅大熱門之選。騰訊畀南非佬沽貨，阿里(09988)就有日本仔減持，股神要沽比亞迪(01211)，咁多磅股面對減持利淡股價走勢嘅消息，港股又無資金流入，嚟緊都係易跌難升。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。