多國央行議息 息口趨升港股短線有震盪
11月1日，部份時間有陽光，都有一兩陣風，近幾日呢啲天氣真係幾舒服。上周五美股三大指數齊創收市新高，道指升89點；標指跟納指則分別升8點及50點。至於港股當晚ADR再跌142點，估計港股短有機會落到24800至25000搵支持。美國聯儲局今個星期會議息，市場普遍預期息口不變，但應該會宣布開始啟動縮減買債計劃。已有市場聲音認為聯儲局為遏止通脹，應該要盡快加息。今個星期除咗聯儲局，仲有唔少央行都議息，其實喺通脹壓力下，全球息口趨升，呢個基本已無懸念。
加息當然短線會為股市帶嚟震盪，但諗深一層，若然要抵抗通脹，資金都要尋求出路，所以喺通脹嘅同時，雖然資金上升令資金成本壓力上升，但唔代表股市會一蹶不振，只要企業盈利保持活力，股市震盪過後，仍可以繼續向上。當然香港呢邊因為跟美元掛鈎嘅關係，美國加息，香港亦無奈要跟隨，只係如果港股嘅企業盈利表現，若然維持唔到增長步伐，港股就難以跟隨美股邊加息，邊炒上。事實上，港股一直大幅跑輸美股，原因係資金因為怕咗政策市而從港股市場撤退，喺缺水嘅情況下，港股愈玩愈縮已成事實。
踏入11月，估計港股仍難擺脫一直以嚟嘅上落市格局，恒指上月雖一度重起多條移動平均線，但100日線(26422)始終阻力大，未能進一步向上突破，港股難逃上落市命運，而上周港股再次失守10日線(25797)，本周或下試20日線(25261)及50日線(25303)尋找支持，而較強支持位喺24800至25000水平。
比亞迪(01211)公布業績後，隨即宣布以276元配售5000萬股新H股，配股價較上周五收市價折讓6.9%。一般人見到配股兩個字就嚇到面青青，認為配股後，嗰隻股份死梗，不過如果大家有跟開藥明生物(02269)，就知配股並非洪水猛獸，皆因藥明生物過去一年多次配股，但股價卻愈升愈有，愈批愈起勁，原因係公司需要集資去發展業務，只要市場相信公司業務發展前景良好，自然有資金願意接貨，咁每次配股沽壓自然好容易消化，批完股又可以重新出發。古天后相信比亞迪將會出現同樣情況，今次配股可能只係一個開始，為咗研發及擴充生產力，公司實在有龐大資金需求，未來配股集資將會陸續有嚟，要說服投資者肯認購配售股份，批股完再炒上係唯一出路，今日配股如能守配股價，而股價因配股消息回軟，正正係一個低吸好機會。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。