6月26日，大致多雲，間中有驟雨，早段局部地區有雷暴。美股上周五走軟，原因係鮑佬繼續放鷹，三大指數下跌，不過納指已錄得連續八個星期上升。美股暫時好淡爭持，俄羅斯發生短暫兵變，令國際形勢變得複雜，或影響整體投資氛氛，暫時美股向上博空間有限，美股或步入整固期。
鮑佬頻放鷹，暗示美國加息周期未完結，短期債息上升，長期債息則回落，令2年期及10年期國債息差再擴闊，由95.5個基點擴大至101.5個基點，市場憂慮經濟衰退的風險增加。這邊廂俄羅斯局勢變得不明朗，令上周已下破萬九關收市嘅港股有進一步轉弱可能。
雖然美國3月份爆發嘅銀行危機已解決，但財長耶倫已開腔下半年會尋求更多銀行合併以化解潛在危機，耶倫所指嘅潛在危機，古天后傾向解讀作商業房產抵押風險，多次地方銀行再爆煲，由於融資成本上升，加上3月嘅銀行風暴，今年到期嘅貸款或令銀行造成更多撇帳。
俄羅斯局勢混亂，雖然兵變只係短暫發生，但不明朗形勢加劇，令美元強勢， 人民幣今早一度見7.3水平後反彈，人民幣弱勢難免令中港兩地股市易跌難升。上周五中概股喺美股表現已強差人意，618銷情淡薄，即使大行齊齊為電商股護航唱好，電商股都無乜起色。各大電商未有積極公布銷售金額，雖然KOL直播帶貨人數直線上升，但銷售額卻未同步增加，咁嘅情況，KOL直播帶貨只賠不賺，甚至連平台費用都唔夠錢畀，咁電商仲點會公布銷售額。
港股喺6月初開始反彈，由18000水平彈足2000點，去到20000水平又未能企穩，主要係一直未見資金入場配合，所謂技術反彈只係乾升挾淡倉，古天后一直未有叫追貨，就係預咗一追貨資金下場就係被鎖死，唔想做韭菜，就只有乖乖做觀眾。港股一直未見減低波幅出現圓底收集，一直未見基金入場作長線部署，港股都未能走出困局，暫時走勢更似繼續一浪低於一浪，5月份18000點未必係今年低位，本輪反彈或告一段落，多條移動平均線已全數失守，唔排除本周期指結算過後，又再回復跌勢，進入下一個跌浪。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。