大市升抵二萬二水平 反見北水沽出重磅股
6月9日，多雲，間中有驟雨，有時雨勢頗大，並有狂風雷暴。隔晚美股反覆偏軟，三大指數下跌，納指未能企穩12200水平，而標指則受制於4200，暫時喺高位反覆，繼續日升日跌狀況。雖然10年期債息高企於3厘之上，美國聯儲局亦開始縮表，但市場流動性暫時未見受影響，只係到現水平再願意入場追貨嘅資金有限，反而資金傾等待回調時候入市。
星期五晚美國將會公布最近嘅CPI數據，預咗呢個數字喺通脹高企下，維持高位，只係市場憧憬通脹已接近見頂，所以唔少預測都認為未來聯儲局加息唔會太過積極。不過高通脹唔喺一時三刻回落，只係市場需求下滑，有助舒緩通脹壓力，但就零售業嚟講，需求急降令庫存急升，零售業不得不降價求售，自然令毛利受壓，從而影響到盈利表現。而美股能否支撐得住，企業盈利表現係一個重要因素，一旦企業盈利預測有所下降，美股自然站唔住腳。
小心中概股除時掉頭
美股搖搖欲墜嘅走勢，直接影響到全球股市表現，呢個亦係古天后對港股後市持續向上，甚至步出熊市呢啲講法有所懷疑嘅原因。不過中概股近日反彈升勢之強勁，確係令到市場嘩然。而中概股咁嘅走勢，亦正好說明炒作嘅資金，似乎唔係外資，而係一向行事較為大膽嘅中資為主。而睇返中概股嘅升勢，由一線股份開展，升勢已蔓延至三四線股份，一啲基本因素較差嘅中概股亦炒上，小心中概股除時掉頭，尤其喺超買已出現嘅情況下，中概股現水平再追貨值博率好有限。
至於港股呢邊噚日成交增至1840億元下再升至22000水平，成交增加配合升勢係好事，但唔好忘記重磅股嘅股價升咗，成交額亦好自然會上升。而恒指亦已逼近100日線，能否升穿企穩，係大市能否更上一層樓嘅關鍵。留意呢兩日升市，北水參與唔算積極，噚日更見美團(03690)更騰訊(00700)紀得北水淨流出。連一向積極進取嘅北水，亦開始喺呢啲水平食糊套現。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。