11月3日，大致天晴，部份時間有陽光，日夜溫差較大。美聯儲局議息維持息口不變，鮑爺雖無放鴿，但字裡行間已暗示息口已見頂，10年債息回落，美股再反彈，三大指數升逾1%，道指升564點；標指跟納指分別升79點及232點。VIX下穿17，反映美股一波回調可能已完結，但美股估值仍然偏高，以回報率計算，回報率只有4%左右，仍低於10年期債息4.6%，呢啲位再高追嘅值博率唔高，都係待回吐低吸。
今晚將有大非農數據，估計新增職位及時薪會保持下降，數據出咗要睇10年債息有乜反應，目前都係偏向息口已開始見頂。從美國第3季GDP達4.9%去睇，美國因為疫情兩年政府放水派錢，民間消費力並未有收縮，只係出現咗消費降級。按美國及中國PPI保持低位，通脹其實已受控，但前題係工資增長唔可以回升。全世界都正經歷消費降級，呢個咪係拼多多點解跑贏京東(09618)跟阿里(09988)嘅原因。
自從工業化大幅提升，生產力已遠高於需求，從來只有供應端求需求端，因此通脹係唔會重演七十年代嗰一種物價飛升至民眾無法負擔嘅地步，反而要留意係無論發達國家抑或發展中國家，都出現高負債還唔起問題。廢除金本位後，各國貨幣背後以美元就是歐元作儲備，美債突破33萬億美元，貶值背後等同其他國家手上美元下跌，結果歐日又爭相QE去對沖，未來銀紙只會越嚟越唔值錢。借貸等同沽空貨幣，去享受資產升值，錢越來越多，供應有限嘅資產相對便會升值，美股正正因為呢個原因，大牛市歷久不衰。
至於港股噚日衝高後回落，恒指噚日受制20日線，高位回落至17200即市見支持，雖然走勢上影線太長，唔多好睇，但幸市美股噚晚大升，拉升夜期及ADR，預期今日再挑戰20日線，成功企穩，可望進一步向上挑戰50日線17750阻力，即市阻力為10月18及19日裂口頂部若17650，支持位為17350-400，預期今日走勢可轉強。只要能守於20日線上，下周向50日線出發。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。