大市維持區間上落 繼續高沽低吸
9月15日，部份時間有陽光，間中亦有幾陣驟雨，天氣炎熱。美國通脹有放緩跡象，降低聯儲局短期收水壓力，加息亦無逼切性，不過美股先升後回，道指跌292點；標指跟納指分別跌25點及67點。隔晚較為矚目嘅，當然係蘋果公司一年一度嘅產品發布會，包括推出iPhone 13系列、新一代iPad等，不過市場普遍認為缺乏驚喜，股價全日跌近1%。
至於港股連跌兩日，噚日早段喺20日線( 25745)爭持，但午後跌勢加劇，恒指全日跌311點，險守25500水平，收報25502點，不過成交額只有1409億元，沽壓唔算好嚴重。港股呢兩日明顯轉弱，主要係市場憂慮恒大(03333) 股價及相關新聞 債務危機或引發骨牌效應，多隻內房股被拋隻，噚日整個板塊閒閒地跌3%或以上。除咗內房股，市場亦憂慮內銀嘅資產質素或下降，內銀股亦被波及，噚日全線腳軟。
由於恒大預期9月合約銷售持續下跌，並預視情況將持續，而出售資產則毫無進展，整個恒大系股價大跌，因為市場憂慮集團出現流動性問題，有消息指地方政府已派聯合工作組進註，市場估計係為公司重組作準備，恒大今次真的GG了。之前古天后提咗好多次，千祈咪以為阿爺會出手救恒大，恒大並非真係大到不能倒，只要銀行體系未受影響，恒大就算要步上重組及拆骨命運，阿爺要做嘅係協調工作，而非真金白銀攞錢出嚟營救。
除咗內房跟內銀股唔精神之外，科網股喺監管陰霾未散下，表現同樣不濟，而坊間亦有分析指，相關股份仍未真正見底，而古天后則多次表示，科網股短期都係有波幅，冇升幅。喺幾個重磅板塊都唔多精神下，港股預期繼續受壓，不過近兩個月港股都係喺24800至26800之間上落，暫時喺消息層面又或技術走勢方面，都唔見有向上或向下突破嘅跡象，喺咁嘅市況下，唯有繼續採取高沽低吸嘅操作方法。集中睇返幾個受惠政策嘅板塊，例如新能源、汽車及環保等股份。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。