大市能否持續反彈關鍵要守十日線
3月2日，天晴，天氣乾燥，午間較為溫暖，日夜溫差較大。隔晚美股偏軟，道指微升5點，但標指跟納指則分別跌18點及76點。業績期過後，美股焦點又重新放喺息口走勢上，近日10債息回升，令美股有回吐壓力。標指喺4000水平有一定阻力，回試3900支持。本月中美國將公布CPI，估計喺油價於2月從高位回落下，2月CPI回調速度有機會加快，由於目前市場正擔心利率繼續向上，FOMC要加大加息力度，一旦CPI有驚喜，唔排除美股反彈。
目前FOMC雖然口吻仍然係偏鷹，不過以實際情況嚟睇，FOMC官員都係出下口術，以防市場過熱，美股值得趁回調吸納。話就話呢期市場氣氛係差咗啲，但睇返虛幣市場保持強勢，反映資金未有risk off，市場對後市仍有一定信心。
噚日內地PMI回升至52.6%，呢個正好反映美國零售開始復甦，庫存問題改善下，重新進行採購，帶動內地PMI回升。當美國本地需求回升，回補庫存下，訂單非但喺第一季重現，喺第二季更應有所增加。
受內地PMI數字創多年新高，港股噚日急升4%，而成交額亦回升至1539億，尚算配合升勢，但噚日急升過後，今日作出回調亦合理，只要回調下仍守10日線20370，成交未有萎縮，能保持喺1300億之上，港股仍有一定上升動力。不過暫時港股都係單靠游資短炒，至今未見再有新資金流入買貨，並坐定定等後市向上。周末期間內地將行兩會舉行，不過數字經濟股就已炒咗上嚟，若然會後再無新消息刺激，呢啲股或者又回歸平淡。暫時大市能否繼續反彈，進一步挑戰20日及50日線，即20800-20900水平，關鍵係10日線能否企穩，若然本周能夠企穩10日線收市，下周反彈可持續。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。