大市見二萬一急轉彎反彈或告一段落
3月8日，大致天晴，日間溫暖，晚上能見度較低。美股隔晚顯著下跌，由開波跌到收市，三大指數跌逾1%。美股隔晚下跌，主要係鮑爺又出嚟放鷹，表示息口頂部可能高過之前預期，即係5.25%未必係息口高位，債息應聲而上，油價跟資源價格下跌，鮑爺放鷹令油價急跌，正好打壓令通脹持續高企嘅油價及資源價格。美國通脹究竟係維持高企，抑或能夠見頂回落，暫時仍屬未知數，聯儲局刻意放鷹，目的當然係為咗壓抑通脹，嚟緊呢兩日會公布大小非農，睇下非農數字對通脹預期有冇啟示。
美國嘅通脹係由疫情所引發，主要係過去兩年供應鏈出現問題，導至物資供應短缺，但全球開始走出疫情，供應鏈亦逐步回復正常，正路通脹理應見頂回落。雖然供應鏈問題得到解決，但勞動成本上漲問題卻未解決，疫情後美國因病而消失嘅勞工人口估計高達350萬人，加上唔少人疫後唔願意再做長工，轉做freelancer及網上創業人數不斷增加，呢啲勞動力唔再輕易回到原本工作崗位，美國高待業職位及高工資增長，均反映就業市場及勞工成本嘅嚴重性，亦係令通脹出現不穩定性嘅最主要因素。
港股噚日走勢相當難睇，早段喺兩個記招期間，一度急升至21000水平，一舉衝破20日及50日線，豈料午後急轉直下，最終更倒跌收市。至夜期跟ADR港股進一步隨美股回落，10日線岌岌可危，預期今日有機會考驗10日線，一旦10日線失守，由上月低位展開嘅反彈就玩完，有機會再下試19600-19800尋找支持，尤其係20000點有重牛區，唔排除噚日殺完21000嘅重熊，呢兩日就下試20000殺重牛，大戶實行上下其手，3月唔會好似1月及2月咁行單邊，將會反覆上落，一唔小心跟錯邊，好容易左一巴，右一巴，呢啲時候，都係少做少錯。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。