大戶減持比亞迪 暫時咪心急撈貨
7月15日，天晴，局部地區雖有驟雨，但熱到人都癲，酷熱天氣警告生效。美股步入業績期，投資者繼續觀望企業季績，美股個別發展，道指跟標指分別升44點及5點，納指則跌32點。美國聯儲局主席鮑爺喺國會上重申，維持寛鬆貨幣政策，同時亦指通脹只屬暫時。而美國嘅專家繼續分成兩派，雖然唔少專家認為美股隨時出現股災，但亦有樂觀一派認為美股估值目前仍然合理，更高嘅企業盈利預測以及美國家庭資產淨值增長等因素，繼續推動經濟復甦，唯一爭論點係通脹前景。
至於港股就炒股唔炒市，即使恒指踏入7月份以嚟，已由29000水平下調二千點至27000點水平反彈，目前移動區間似乎下移至27000至28200，但資金仍於不同板塊間流動，又唔係完全無股可炒，反而點捉資金流，多做短線操作，又唔係完全搵唔到食。
不過內地政策風險真係嚇親人，好地地股王騰訊(00700)都因為監管風暴跌到一仆一碌，雖然呢兩日叫有啲反彈，不過連登契媽都開到口話中概股估值仍有下調空間，即係相關股份都係冇運行，呢期只會有波幅，冇升幅。其實股王失色都有跡可尋，早於年初大股東南非基金減持，騰訊就從浪頂回落，近日再見契媽基金Ark減持，騰訊要回復過往王者本色似有難度。
而近日另一星級汽車股比亞迪(01211)亦遭重量級股東，股神巴菲特愛將李褖連日減持，目前持股量由7%減至1%，咪睇少呢1%，星級大戶減持，顯然係認為目前係合適套現時候，某程度上反映噏隻股份回報或已不如過往吸引，又或者有新嘅風險浮現，需要重新部署。既然比亞迪失去大戶寵愛，就算呢兩日急跌，暫時都唔好多手撈貨。散戶有個毛病係自作聰明，眼見某股份急跌，就會心思思想撈貨博反彈，其實大戶部署又點會事先將揚，但既然資訊披露正在或已經減持某股份，斷估唔三兩日後又再將資金投入該股，既然如此，何不跟住大戶走。就好似騰訊喺南非大股東減持後，股價由1月750元高位跌咗三成至500元附近先識反彈，就當500元喺短期底部，都用咗半年時間先搵到個底。咁家下李褖剛減持完比亞迪，比亞迪再用幾多時間搵出個底，古天后無水晶球，既然如此，不如暫時擺埋一邊，要睇汽車股，不如揀返長城(02333)或吉利(00175)似乎仲穩陣。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。