大笨象今非昔比 過往輝煌日子不再
8月3日，多雲，間中有驟雨，亦有狂風雷暴，作打風，天氣又悶又焗。雖然唔少美企都開出亮麗業績，但疫情持續加上市場憂慮經濟見頂，道指先升後回，盤中曾升256點創新高35192點後，收市倒跌97點；標指跟納指則分別跌及升8點。變種病毒擴散，而美國財政刺激措施觸頂，目前市場表現跟經濟已脫節，更有警告指散戶抱團正加劇呢個情況，更形容股市實際上已經變成某種層面上嘅賭場。事實上，投資者要有心理準備，美股隨時出現深度調整，某程度上應該逢高減持。
美股呢個星期焦點係周五美國7月非農就業數據和失業率，而全球央行年會Jackson Hole將於8月下旬舉行，留意會上鮑爺會否宣布縮表，令美股由高潮回落，成為走勢上一個轉捩點。尤其美股估值唔平，美股美債音樂椅遊戲一旦暫停，美股或進入一輪估值調整下跌，勢必拖累全球股市下跌。
至於港股捱過7月反艇月，能夠保住本金全身而退已係萬幸，若然未有理會古天后勸籲輕倉及多做短線操作，尤其係滿倉科網股嘅話，此刻何止難捱，本金縮水一大半，要板平難度大增，所以幾時都要嚴守止蝕。中港股市嚟到呢兩日先稍為回穩，回顧上周走勢驚心動魄，踏入8月份仍需步步為營。
睇返恒指日線圖跌穿250日線(27172)後急挫至24800水平先叫有啲支持鄋，短期要收復呢條傳統牛熊分界線難度甚高，退而求其次睇住周線圖，上周失守100周線(26565)，假如短期內未能收復26500水平並企穩其上，恒指喺8月仍有機會再作深度調整。
噚日大笨象(00005)派成成績表，今年上半年列帳基準稅前利潤已回復至疫情爆發前即2019年同期八成以上，算係從疫後站穩住腳；並一如預期宣布從新派發利息。只係中期息僅每股7美仙，折合每手收息約218.4元，可是市場普遍認為「派得少」，而噚日下半場大笨象升幅大大收窄，已反映市場對其派息唔多收貨。
其實大笨象派息未能令市場滿意，亦非其股價積弱致命傷，以大笨象嘅國際資本背景，扎根香港且致力發展內地市場嘅策略，喺中美角力下頓成「夾心人」，增長前景無奈跟國際地緣政治風險掛鉤，好明顯呢隻過氣股王，喺中美爭霸，全球趨向分裂下，難以回復昔日輝煌日子。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。