大笨象揭開業績期序幕
2月21日，大致天晴，天氣乾燥，早上部份地區能見度較低。隔晚美股假期休市，外圍變動唔大，港股噚日亦只係窄幅上落。A股噚日忽然表現勇猛，主要係下月兩會前，有資金偷步入市炒作，主要靠外資積極掃貨，但內地本身買入資金有限，主要係內地銀根唔講得上係鬆動，尤其去年內房爆出債務危機後，樓市疲弱，內地人手上多過一套房嘅供樓供到氣咳，仲邊有閒前投入股市。
內地股市過往最多散戶捧場嘅創業板，由去年第四季低位2250水平回升，至1月升破橫行區2480，相對低位僅累積一成升幅，相對港股由去年10月低位反彈至22000-23000水平，反彈幅度達五成，可見內地創業板嚴重落後。而創業板更於本月見2661高位後回落，重返橫行區附近，可見弱勢未改。雖然噚日深滬股市做好，但成交額只有9500億元，相對過往逾萬億入場資金，A股成交未算活躍。
港股噚日考驗50日線，最終50日線總算守住，但暫時受制21000水平，目前港股仍處於調整浪中，自去年10月低位回升至1月高位，低位反彈五成，2月份嘅回調變得合理。但由高位接近23000水平回調至21000水平之下，高位回吐一成仍未見買盤積極入場，近日成交低迷，反映市場買賣兩閒。即使有個別板塊炒作，但亦出現持久力不足問題，資金入場只願短炒，唔多願意買貨坐定定。雖然呢幾日有資金入場炒兩會概念，博阿爺於下月兩會期間，發放利好股市消息，但諗嚟諗去，阿爺暫時又唔見得有條件放水，至於支持基建、新能源等政策，亦唔係乜嘢新鮮事，炒兩會消息亦係鬥快落車，以快打慢，呢啲時間資金都係打游擊，要說服資金入場買貨坐定定，睇嚟3月踏入業績期，企業嘅業績交唔交到功課係一個關鍵，而今日由大笨象(00005)揭開業績序幕，先睇呢隻指數重磅股，能否率先扭轉指數調整之勢，留意10日及20日線能否得到業績帶動而收復。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。