寧選劫後重生阿里而不盲追快手
2月5日，天晴，乾燥溫暖，日間出猛太陽，喺街行多兩步都身水身汗。美股隔晚做好，隨住業績期展開，唔少企業都交出一份見得人嘅成績表，加上最新嘅經濟數據表現理想，刺激美股三大指數齊升，標指更創收市新高。GME隔晚繼續下瀉，雖未重返散戶大鱷對戰前水平，但已較高位跌九成，唔肯止蝕，仲牙斬斬話SH(Strong hold)嘅美國連登仔，隨時一鋪清袋。GME完了吧，如無意外，不過美國財政部長耶媽，表示需要對近期市場個別股份震盪進行更深入調查，古天后早幾日已提到，呢類投機性活動已玩到過晒火位，監管機構及有關當局干預調查，音樂椅遊戲必定玩完。
今日港股焦點必定係萬眾矚目，熱爆全城嘅快手(01024)，隔晚暗盤價已勁升，個別券商暗盤價更曾高見421元，最終報收336元，抽中IPO嘅幸運兒，每手穩賺超過二萬蚊。至於無抽中IPO又可以點做? 古天后無水晶球，無可能預知其走勢，只可以話以快手嘅市值及流通量，仲有成交量，肯定通過快速納入機制，被恒指服務公司納入多個指數，包括恒綜指及恒科指等，同時亦會輕易取得港股通入場券，最快可於今日收市後生效，即係下星期一北水就有機會入場。不過北水喺下星期二開始放春節假期，至2月18日再下一個星期四先假後回歸，即係話就算快手有北水進場，春節長假期前只有一個交易日可以入場。
快手首日上市，古天后決定食花生，抽中IPO有貨當然可以選擇套利過肥年，但唔沽貨持有博北水入場再升亦唔係問題，但要追貨就免問。睇返快手發行股數以300元計，市值已達12000億元，若以尋日暗盤高位400元水平計，市值更達15000億元，快手值唔值呢啲價見人見智，雖然快手都係高增長嘅科網企業，但若然現價300元水平，市值達萬二億，即係較已有盈利嘅小米(01810)高出一倍，合理與否，大家心中有數。
與其去追逐過萬億市值嘅快手，古天后寧願現水平買入阿里(09988)或小米，前者旗下螞蟻集團已跟監管機構掂數，即使重啟上市未必係短期嘅事，但以集團本身業務規模及優勢，已經係業內龍頭。至今阿里仍然係中國最大電商，市佔率及品牌溢價唔見得有大改變。目前只待監管機構整改方案敲定，內地再開閘放北水入場，阿里定能一飛沖天。要喺一件上市新丁，尚未知如何推算估值，以及一間業務穩賺不賠，劫後重生嘅大藍籌之間作出選擇，似乎唔係一件難事。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。