小米美資持貨有限 控制權仍在北水手
1月15日，大致天晴乾燥，但部份地區有煙霞，氣溫回升至20度以上，留意回暖一兩日，周日氣溫又再度下降。有消息指拜登計劃推出規模近2萬億美元紓困方案，並就其刺激經濟計劃發表講話，美股三大指數先升後回，跌幅由0.12%至0.38%不等。
侵侵離佢卸任總統之職只有一星期唔夠，但仍積極打擊中國企業，令中美關係持續緊張，美國國防部周四宣布，將小米(01810) 、飛機製造商中國商用飛機(COMAC)等9家企業，列入涉嫌與中國軍方有聯繫的黑名單之中。小米ADR股價急挫至30.63元，今日小米如果有30樓下，又係特價掃貨好機會。有別於之前已被制裁嘅中海油(00883) 及中移動(00941) 等，小米本身係由內地資金主導，單係透過互聯互通基制嘅北水持貨已超過一成，而大部份街貨都係由內地基金持有，莫講話美資，即使其他外資，持有小米嘅貨好有限。換句話講，即使拜登上場後，仍維持相關禁令股嘅行攻命令不變，美國投資者要喺今年11月11日前清倉，美資要沽嘅小米仍有限，唔似得中海油跟中移動，外資尤其美資持重貨，而北水喺呢幾日掃完貨持有嘅貨都只有5-7%。
更何況小米今時唔同往日，由一隻單係做手機嘅硬件股，演變為IoT股，IoT嘅概念一直受到內地資金追捧，而手機業務方面，小米近呢一兩年嘅市場份額亦不斷提升，尤其印度市場發展理想，管理層對三大業務發展樂觀，今年積極擴展其線下分銷渠道，預期通過改善產品組合及分銷渠道，智能手機業務可於國內外取得更多市場份額。小米為咗鞏固市場地位，高端手機產品定價將更加進取，毛利率料保持喺相對穩定嘅高個位數水平；物聯網業務亦有望在今年恢復增長。古天后對小米前景仍充滿信心，30樓下嘅小米絕對買得過，如果錯過咗舊年小米嘅升浪，無貨想建倉，今日就係好機會，30樓下仆倒買，最多穿28，失守50日線打靶，兩蚊左右博上望40樓上，小米今年萬億市值為目標，呢條數咁簡單易計，唔係咁都唔衝呀。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。