市場觀望鮑爺於央行年會發表講話
8月26日，大致天晴，局部地區有驟雨，日間天氣酷熱。美股隔晚觀望氣氛濃厚，市場等待Jackson Hole會議，各央行對收水嘅指引，尤其係美國聯儲局會否對收水時間表較明確指示，當然市場亦關心通脹問題，係直接影響今後各央行對貨幣政策嘅決定。美股窄幅上落，標指跟納指再創收市新高，而道指則升39點，整體變動唔大。
不過當市場等待鮑爺喺Jackson Hole發表講話之際，聯儲局數據顯示喺周三逆回購操作成交量達1.147萬億美元，再破周一紀錄。由於聯儲局一直維持寛鬆政策，導致銀行資水浸，現金供應過剩，自7月30日以嚟，聯儲局逆回購操作已多次突破1萬億美元。換句話講，就算聯儲局未有收水時間表，喺多次逆回購下，美國已進入被動式收水狀況。銀行水浸，市場資金充裕，呢個正正係美股高居不下嘅原因之一。
至於港股表現仍反覆，經過周一反彈後，噚日港股高開低走，表現令人失望，但暫時又未見到有任何重大利淡消息令港股進一步向下探底，睇嚟港股將會喺25000至26000之間上落，等等下周一期指結算後，先會有更明確方向。
自2018年中美爆發貿易戰，中美關係呢兩年疫情持續下一直膠著，不過有傳聞指華爾街「老行尊」繞過拜登政府，正身處北京與內地官員會晤，尋求中國對美國企業進一步開放。另有消息指，被列入貿易黑名單嘅華為，獲美國放行進口數以億美元計嘅車用晶片，中美關係似乎有轉機。不過中美角力係咪就此完結，暫時言之尚早，尤其中美各方面競爭愈嚟愈大，要短期達成貿易和解可能性極低，雙方關係喺短期亦唔見得會有太大改善。
有分析指，華爾街派代表跟中方會面，主要係中國監管不斷擴大，或導致國際投資者蒙受損失，美國金融界只希望喺對話中獲得更清晰資訊，但此行對改善中美貿易關係未必有重大意義。至於放生華為，准許華為購買汽晶片，主要係全球車用晶片供需失衡嚴重打擊相關產業，加上美國提供晶片或令自身受益，促使今次放寬對華為禁令，但美國對中國與日俱增嘅競爭力始終忌諱，唔排除幾日美國又會重新發出禁令。暫時唔好對中美關係改善抱太大期望，喺變種病毒肆虐下，各國忙於應付疫情，中美雙方角力只係暫時緩和，關係改善言之尚早，而貿戰結束更加係遙遙無期。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。