市況仍反覆暫未宜大手撈貨
5月12日，部份時間有陽光，日間相當炎熱，局部地區有一兩陣驟雨，嚟緊幾日繼續熱到飛起。通脹升溫憂慮持續，美股三大指數下跌，納指早段曾跌近300點，其後科技股拋售壓力緩和，跌幅收窄更一度回升，最終跌12點收市；道指跌473點，為自2月26日以嚟最大單日跌幅，標指則跌36點。
愈來愈多投資者憂慮通脹風險升溫，擔心大市缺乏上升動力，大摩警告勞動力短缺可能使持續推動大市上升的經濟復甦受到打擊，即使預期明年仍可能創新高，但今年回報平平無奇，甚至有機會回調兩成。港股噚日插水，恒指退守二萬八關，跌勢更蔓延至所有板塮，連最近強勢嘅資源股及航運股亦漏晒氣，炒股唔炒市亦搞佢唔掂。
不過港股顯著下跌，大大力踩一腳，反而易博反彈，持續呆滯窄幅上落，波幅愈見收窄，唔單止消耗市場購買力，更消磨缸邊友意志，陰下陰下仲容易陰乾缸邊友。港股噚日一跌，失守二萬八後，短線最近一個支持位喺27500，而下一個位則要落到27000，至於有人睇到26500甚至25500，似乎言之尚早，不過恒指14日RSI剛穿40，未可以話超賣，已減晒倉輕磅或持有現金，暫時仍未係時候大舉撈貨，始終市況未穩，有意趁低吸納，可以等更多超賣訊號再入市未遲。又或者係待市況喘定，調整接近尾聲，買貴些少無問題，寧買貴，莫買錯，記時都係無錯。
值得一提係近日熱錢由股市流入虛擬貨幣市場，唔少專家已警告，虛擬貨幣係一個大泡沫，最終呢個泡沫將破裂，持有相關資產嘅散戶，將要承受沉重打擊。呢批專家嘅論據係基於虛擬貨幣不足以取代傳統金融業，尤其當央行數碼貨幣(CBDC)面世，央行將希望保持對貨幣壟斷地位，維護政府權益，一旦CBDC成為主流，足以消滅虛擬貨幣。不過古天后暫時又未係太擔心虛擬貨幣短期會玩完，始終炒作虛擬貨幣嘅散戶，仍較炒股散戶少一大截，暫時仍未去到全民皆幣嘅情況，不過虛擬貨幣波幅驚人，自問心臟唔夠強壯都不宜沾手，而有參與炒作虛擬貨幣嘅炒家，要做好風險管理，切勿投放過重資金喺呢項資產
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。