市況反覆難炒仍能找到獲勝機會
9月9日，大致天晴，天氣酷熱，稍後局部地區有驟雨及雷暴。美股隔晚受壓，三大指數下跌，繼高盛調低美股評級後，大摩亦踩多腳，將美股評級降至減持，全球股市評級就下調至持有。大摩表示，10月份經濟增長面臨「巨大風險」，其於全球配置中更喜歡歐洲及日本股票。大摩補充，同時買入巴西股票、賣出黃金，並持續遠期做淡美國。大摩提岀5個投資者要注意嘅關鍵主題，分別係中央銀行政策歧見、疫苗接種、估值分歧、服務業消費復甦，以及2004年信貸市場嘅教訓(指當時聯儲局聲稱保持耐心，半年後卻迅速加息)。
除咗高盛跟大摩之外，花旗跟瑞信都提醒投資者要注意美股前景，而事實上，美國國會未來數周磋商基建、預算及債務上限等議題，被市場形容為10年來最集中嘅政治風險。而經常用嚟衡量股市估值嘅「巴菲特指標」，即股市總市值除去國內生產總值(GDP)近期不斷飆升，全球版指標更飆升至破紀錄的142%，顯示美國以至全球股市被嚴重高估，引發投資者對於未來可能出現冧市嘅疑慮。話雖如此，暫時美股未見短期內出現大冧市嘅跡象，不過古天后長氣啲再提大家，要睇實美國10年債息，會否出現急升。
對於全球估值過高問題，其實中港股市早已因為內地監管風暴已先行擠出水份，兩地股市暫時真係未見估值過高問題，或者有個別股份估值仍然唔平，但近期熱炒、受惠政策嘅電力股；因為全球航運費持續高企嘅航運股，由於之前一直被低估，就算近日累積唔少升幅，暫仍未見出現估值過高問題，反而正處於估值修復之路上。而一直受監管風暴困擾嘅科網股，經過幾個月時間調整，估值亦已回復正常，唔少堅離地，即使一時三刻，未見再有大量資金流入，科網股似乎已成功尋底，陸續見反彈，就算未能回復強勢，頂多都係區間上落，唔再見到持續破底。
事實上，港股今年過咗第一季之後，一直處於大型區間上落嘅走勢，跟舊年一浪高於一浪嘅走勢完全唔同，當然對於缸邊友嚟講係比較難炒，不過只要小心控制注碼，緊貼資金流向，仍然可以喺唔同板塊之中，搵到機會。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。