市況未穩 保本為上
7月28日，日間短暫時間有陽光，亦有幾陣驟雨，酷熱天氣生效。隔晚美股回吐，中止6連升，市場關注大型科企業績，以及等待聯儲局議息結果。至於港股喺過去兩個交易日，恒指累計急瀉2235點，周一裂口低開失守250日線後跌唔停，不過落到嚟25000點水平，短期有反彈唔出奇。尤其噚日成交創紀錄增至超過3000億，擺明係大撼大。
咁究竟反彈應該溝貨，抑或趁機會逃生？古天后會選擇後者，由內地監管風波未知幾時完結，重磅科技股仍受困擾，將會令估值再度被下調，反彈浪應該係逃生機會，而並非再溝貨等運到。由於過去兩日跌市成交放量，反映無論外資或北水都以減磅為主。自周一開始，外資基金拆倉迹象明顯，外資噚日更不問價掟貨，市場即有傳聞指美國或出措施限制美資金基投資中港股市，觸發更多沽盤拋售，散戶被追孖展被迫斬倉，令跌勢加劇，沽壓嚴重令港股急挫。
而年初大量買入港股嘅北水，近日持續撤離，噚日再錄得淨賣出12.75億元，雖然金額較前幾日有所減少，但北水已經連續7個交易日錄得淨流出，為2018年11月以嚟最長，累計走資逾249億元。
至於高息股噚日逆市上升，資金流入公用股避險，中電(00002) 股價及相關新聞 跟電能實業(00006) 股價及相關新聞 已升上超過一年高位，現價唔再吸引，當大市反彈時，呢批股份上升空間唔大。至於重磅科網股急跌，又值唔值得買入，好似騰訊(00700) 股價及相關新聞 落到現水平看似吸引，只係未知估值會否被下調，即使有心買貨作長線投資，都要有心理準備隨時再捱多一成跌幅，股價再見400元機會仍有，想買貨都要分段吸納。
講真咁大量資金流走，短期唔會咁快重返港股，呢段時間若然手上有貨趁反彈減持，倉位當然有咁低減到咁低，孖展跟衍生工具不宜沾手，呢啲市況都係現金為王，保本為上。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。