彈完係咪續跌 抑或成功築底？
3月16日，大致多雲，日間短暫時間有陽光，晚上更有一兩陣雨。今晚聯儲局議息，市場已消息聯儲局自2018年開始第一次加息，美股三大指數反彈，全日高走並以接近高位收市，道指升599點；標指跟納指分別升89點及367點。至於港股隔晚喺ADR跟夜期亦反彈，但中概股則個別發展，大部份結束跌勢，只有阿里巴巴(09988) 續跌1.2%。
有分析指大部份基金經理認為，大多數股市投資者現在預計2022年將出現熊市，全球股票配置已降至2020年5月以來最低，現金水平則上升至近6%，而大宗商品配置飆至創紀錄的33%。不過亦有分析認為，目前投資者普遍預計今年全年將加息7次，而由於大宗商品價格回落，市場對通脹擔憂有所減少，故近期遭到拋售嘅增長股將有喘息機會。
目前市況仍處於相當動盪嘅狀況，尤其俄烏局勢仍未明朗，雖然市場憧憬雙方或能透過談判達至停火，但歐美同時卻加大制裁俄羅斯力度，呢一個問題始終會困擾住環球股市。至於港股呢邊相信短線有機會隨外圍反彈，只係可以彈幾多，彈完係咪持續跌勢，抑或已成功搵到個底，展開反彈並逐步收復失地，暫時言之尚早。
不過從多個客觀因素分析，港股暫時仍然充斥住不確定因素，包括俄烏戰事持續，本地疫情反覆，令港股近日遭猛力拋售。港股過去幾年持續跑輸國際其他重量級市場，跟中資股佔比持續增加有關，尤其過去兩年科網股熱潮，確曾帶動港股成交及新股表現，更其係瘋炒至估值極度不合理，同時外資跟內資趁高「收割」，進一步加劇貧富懸殊。至去年內地對各行各業實施雷厲監管，內房、科網及內需股等全部受影響，相關股份跌到一仆一碌，令港股市一片狼藉，不堪入目，唔少散戶損手，更甚係散戶普遍未有好好執行止蝕，財富蒸發。最慘係近日疫情嚴峻下，各行各業幾乎陷入停頓，企業跟打工仔均未能看清前路，手上已無資金可以入市，即使見到港股連日暴挫，亦有心無力。
雖然港股現價估值已相當便宜，但美國卻出招狙擊中概股，進一步重擊港股。即使唔少中概股已跌至蔗渣價，無奈喺美國加息周期下，美元資金吸金能力較強，呢個係資金從中國資產嘅重要因素。只係港股喺短短一個月內已急跌6000點，短線反彈亦可實現，假設呢個反彈以黃金比例反彈0.382計算，假設噚日18200係短期底部，即係反彈有機會重上20500點水平，不過呢個係較樂觀嘅睇法，港股有冇本事重越20000，仍要注意俄烏局勢發展，以及本地疫情能否受控。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。