後疫情投資主軸 新經濟股仍為組合核心
12月16日，早上相當清涼，日間短暫時間有陽光及乾燥，清涼天氣持續。雖然歐美國疫情持續惡化，各地收緊防疫措施，限制社交距離，但市場憧憬財政刺激方案談判有進展，美股做好，三大指數齊齊升逾1%，納指,冉創收市新高。而聯儲局正展開為期兩日嘅資幣政策會議，市場等待聯儲局會否發放進一步QE嘅訊息。
恒指維持窄幅上落悶局，目前一直喺26200至27000之間上落，不過繼續走勢上正營造圓頂向下，留意26000點不容有失。雖然拜登已獲得足夠選舉人票成為候任美國總統，不過至今侵侵仍未有公開承認敗選，甚至喺離任前先後更換國防部長及司法部長，難免令人懷疑侵侵會否利用極端手段推翻大選結果。喺下月拜登正式上任前，仍然有一定變數，隨時成為股市大幅調整嘅藉口。
有專家表示，無論拜登成為白宮新主人，抑或侵侵成功翻盤留任，對今年炙手可熱嘅科技股都唔係好事，皆因民主黨一向行福利主義，定必向賺大錢嘅科網巨開刀徵重稅，而科技巨企將面對更大嘅反壟斷調查風險，被迫「拆骨」或被判繳巨額罰款。如果侵侵連任的話，對科技巨企反壟斷調查唔會鬆手之餘，肯定會對今次選舉偏幫拜登嘅社交媒體，呢一堆股份肯定有難。
不過古天后對新經濟股前景仍充滿信心，尤係今年受惠疫情嘅電商平台及網上娛樂股份，隨着網絡崛起，全人類正歷經一場延續20年嘅消費習慣變革，「電商網購及宅娛樂」等兩大新消費潮流，已成為後疫情時代投資主軸。即係長線組合內，JATMX呢幾隻鐵膽，未來一年仍然係古天后長線投資核心組合。
全球著名諮詢機構麥肯錫(McKinsey)9月調查發現，來自中、德、英、美等4國嘅消費者中，37%表示今年假期間喺網絡上嘅消費額可能會比去年還要多；願意喺實體店使多啲錢嘅消費者則只有5%。該機構更預測，如果疫情再來，網上購物嘅趨勢只有增無減。其實疫情始終有結束一日，但消費習慣改變恐怕唔會逆轉。
疫情改變咗消費趨勢，更加速全球數碼化進程。全球民眾使用串流平台嘅時間，喺疫情期間爆炸性增長，投資方面，包括網絡購物、電子遊戲、影音串流等，全部係疫情受惠族群，除消費產業外，消費商機已涉足電訊、科技，甚至金融產業。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。