恒大出售資產告吹 阿爺無意出手相救
10月21日，短暫時間有陽光，間中有幾陣驟雨。美股隔晚喺大型企業公布業績理想下，道指繼續做好，更創盤中新高，收市升152點則未達收市新高；標指跟納指則個別發展，標指升16點，納指則跌7點。美國首隻比特幣ETF喺周二喺紐交所上市後，比特幣持續向上，隔晚更創新高，即使中國之前大大力打壓虛擬貨幣，但亦難擋投資者對比特幣嘅熱情。而虛擬貨幣當然屬於高風險資產，近日虛幣再度炒得火熱，反映資金風險胃納仍高，即使再多聲音指美股隨時出現大幅度調整，甚至有較悲觀者指美股股災已近，道指卻喺被視為傳統股災月嘅10月再創新高。
到目前為止投資者對美國財報季嘅整體表現大致滿意，迄今為止已公布業績嘅標指成分股中，82%成分股業績超過預期。而耶媽又表示，雖然近日就業步伐放緩，但預計美國經濟復甦下，明年將恢復充分就業。
至於港股呢邊嘅焦點，當然係恒大(03333)出售恒大物業(06666)予合生創展(00754)交易告吹，雙方今日復牌，但兩間公司嘅通告，口供唔一致，恒大就話合生創展唔夠班，搞唔掂恒大物業G.O.，所以喺10月13日解除交易協議。不過合生創展就反擊，指公司指訂立協議收購恒大物業約50.10%股本，但恒大未有按照該協議條款，喺2021年10月12日完成向買方出售銷售股份。即係恒大玩嘢，話賣又唔賣。
如果合生所言屬實，咁合生係有資格向恒大追討10億元訂賠償，當然大前題係窮到燶嘅恒大仲有錢賠嘅話。總之暫時就各執一詞，口同鼻拗，呢單未能完成嘅交易，演變為羅生門事件。
不過恒大出售資產先後觸礁，即係短期內恒大都無法套現償債，而阿爺至今從未有意思出手打救恒大，只係扮演一個監察人角色，主要任務係防止恒大嘅債務問題，影響房地產整個產業資金鏈，以及確保金融系統唔會出現系統性風險，似乎恒大債權人收唔收得返投資咗落去嘅錢，阿爺就唔多關心，畢竟投資任何資產都有風險，食得咸魚抵得渴，若然恒大有乜冬瓜豆腐，債權人血本無歸嘅話，都唔多關阿爺事。仍持有恒大系股份喺手嘅缸邊友，唔好再有任何幻想，恒大並非大到不能倒，真係要有心理準備，恒大最終可能係清盤收場。
大市升咗幾日，嚟到二萬六樓上，恒大賣資產不成呢個都係負面消息，大市正好用呢個消息做藉口抖抖氣，只係恒指成功收復50日線(25392)企穩後，市底明顯轉強，只要恒指仍能守於二萬六關之上，大市回調壓力有限，短期仍有機會再向上挑戰100日線(26664)，暫時都係順勢而行，未宜做淡。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。