恒指三萬或只係另一起步位??
2月9日，多雲，間中有雨，氣溫略為下降，最高氣溫只有21度，風勢有時頗大。美股隔晚再創新高，市場憧憬拜登政府快將通過1.9萬億刺激經濟方案，三大指數以全日高位收市，並齊創收市新高。有分析指雖然近日有散戶大戰大鱷，反映喺市場流動性過度充裕下，散戶過度投機，某程度上反映市場有部份散戶已出現非理性亢奮，但亦唔代表美股嚟到呢度就行人止步。由於疫苗已廣泛應用，美國經濟可迅速復甦，更有望回復增長。加上聯儲局繼續以寬鬆幣策維持股市動力；雖然美股目前估值唔平，但喺水頭充足兼通脹低企下，美股可保持升勢。美國經濟復甦剛剛起步，市場仍處於牛市中，相信一眾呼天搶地高呼美股隨時爆煲，兼日日等緊股災嘅大淡友，應該感到不是味兒。
至於港股呢邊臨近農曆新年長假期，而北水今日起閂閘放假，直至下周四才回歸，少咗北水支撐，港股難免轉趨淡靜。值得留意係拜登上任後，先後與多國政府及領袖通追，獨欠跟中國領導人接觸，直至上周六，終於有消息指美國國務卿布林肯約會中國官員通電話，事後拜登終就對中國策略表態，指中美關係雖然維持「激烈競爭」，但就無必要「發生衡突」，並表示美國將採用「國際規則」，而唔會行之前侵侵嗰一套。
拜登金口一開評論中美關係，反映拜登政府終定下對華策略，中國雖仍被定性為美國嘅「最嚴峻的競爭者」，但雙方將會係競爭得嚟同時合作，總之以美國利益作為大前題，跟侵侵玉石俱焚，寧願自己重創亦要惡鬥嘅作風有所改變。雖然侵侵凡事不按理出牌嘅作風難測，但拜登滿肚密圈可能更難應付。不過拜登講明會聚焦於「國際規則」，跟侵侵我行我素，完全唔跟國際規則自把自為作風大不同，至少喺拜登任期內，全球或回歸一體化，香港作為中國對外嘅國際金融中心，應該有運行。
踏入2021年以嚟，北水湧入港股，持續錄得淨流入，去到尋日北水放假前仍對港股不離不棄，仍錄得淨流入，反映北水已下定決心持貨過年。古天后認為北水今年積極流入掃港股，並唔會話首季進行配置即完成，港股今年仍可受惠北水持續湧入，加上美國對中國政策趨向緩和，全球一體化趨勢重臨，港股嘅國際金融心水地位或有機會再發光發亮。而喺美國及中國經濟復甦下，唔單止新經濟股一枝獨秀，舊經濟股亦有望復甦，新舊經濟股接連落鑊，恒指三萬指日可待，更有可能只係另一個起步位，今年要稍稍調節，貪新之餘亦唔好忘舊。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。