恒指上升軌穩守可挑戰百日線
11月29日，大致天晴，天氣炎熱，晚間有薄霧。隔晚美股受聯儲局有委員放鷹影響，三大指數向下，齊齊跌逾1%。標指喺4100點前阻力唔細，暫時能守住3900短線支持，仍有條件挑戰阻力，睇嚟要喺3900-4100之間整固一下，目前資金入場變得審慎，畢竟由10月低位反彈咗咁多，加上接近年紀，資金買貨唔會再咁積極。
油價跟大宗商品價格回落，市場預期未來通脹放緩增速，10年期債息回落至3.62%，預示明年初息口於5%左右見頂。美聯儲局雖然遲咗起步加息，但經過幾次密密加息後，通脹總算壓得住，睇怕就算通脹見頂都唔會咁快減息，同埋聯儲局官員會不斷出口術放鷹，以防市場過熱，要有心理準備，每次有官員出嚟放鷹，美股都會有啲震盪。不過把口放鷹，同實際議息又兩回事，只要通脹能成功控制，聯儲局當然無必要夾硬加息令經濟硬著陸。
睇返有關感恩節嘅銷售數據，從Black Friday線上銷售仍能再升2.3%創出新高，連帶週一嘅Cyber Monday也有8.5%的高單位增長，美國經濟仍然強勁。週三及週五會公佈小非農及非農數字，過往若新增職位大幅增加，聯儲局會擔心經濟過熱扯高經濟，令美聯儲有更大空間去加息。目前形勢有變，就業數據好可能變成好事，反映美國經濟更大機會軟著陸，相信都係美聯儲局所樂見。
至於港股，似乎都跟住古天后嘅劇本走，噚日大市因為內地疫情擴散，兼多地爆發反抗疫示威，恒指低開一度失守17000，但最終收復20及50日線，並企穩17000水平，港股成功喺回調後再次回升，之前預期結算轉倉完成後，大市有條件繼續向上挑戰18500-19000水平。而噚日大市回落至17000水平之下，買盤再現，成交亦回升至1000億元之上，12月大市乘住年結之勢，重上萬八無難事，跟住就係18500-19000，呢個係年結目標，噚日低位撈咗嘅指數重磅股，暫時可以坐定定等食糊。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。