恒指有機再尋底 移動區間或下移
9月17日，部份時間有陽光，間中有幾陣驟雨，日間天氣酷熱。雖然已臨近中秋，但天氣仍異常咁熱，噚日更有部份地區因為高溫帶嚟狂風暴雨，狂風雷暴對流強烈更將大氣中嘅冰粒帶到地面，形成落雹情況。有口痕友話無啦啦落雹，肯定爆大鑊，睇返呢個星期港股跌逾千點，又確係幾大鑊，完全應晒景。隔晚美股表現各異，美國經濟數據表現參差，當中零售銷售數據意外上升，道指跟標指分別跌63點及6點；而納指則先跌後回升，全日升20點。
美股居高不下，但近日已見疲態，而美股下跌並非取決於上升時間長，又或累積升幅大，通常市場調整會係由某個負面因素所帶動，不過暫時未見有導致美股大幅回調嘅負面因素出現，但同時亦缺乏利好因素再推動美股向上，令美股處於目前唔上唔落嘅情況。
至於港股則弱勢持續，幾個利淡因素夾擊下，港股噚日跌至今年新低，恒指噚日再跌365點，4日累跌1538點，再陷入技術熊市。睇返呢幾個月恒指走勢，先喺7月27日跌至24867點，剛好自年初2月17日收市高位31084點調整兩成，有入熊之險，後其反彈。至上月20日，恒指再次回試低位，但跌至低點24581點又再反彈約2000點，但可惜受制50日線，再度回軟。噚日恒指再次陷入熊區，重返24500水平。若然短期能夠喘定並反彈回升，可以話係三底形成，但如果再一次彈完再散並穿底，三底形態不成，再陷熊區，港股將確認步入熊市。
目前恒指已失守下降通道中軸，下一個較重要支持位喺23300點，為下一個成交密集區底部。睇返自今年初港股見頂後，移動區間拾級而下，由2月見頂急跌市，恒指於27700至29000點上落約四個月，其後再喺7月份跌穿27700水平，移動區間下移至25000至27000之間。若然今次恒指未能於短期內重上25000點企穩，移動區間有幾會下移。
從呢幾日港匯表現疲弱反映外資正外逃，加上適逢內地中秋節長假期，北水暫停至下周四恢復，少咗北水助力，加埋外資力沽，今轉恒指破底後，反彈動力大減，恒指尋底之旅未完，即有機會跌至23300點尋找支持，如此一來，恒指區間或進一步下移至23000至25000點。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。